Харгиа цэвэрлэх байгууламжийн цэвэршүүлсэн ус стандартаас давсан бохирдолтой учраас Төв цэвэрлэх байгууламжийн ачаалал буурахгүй байгаа тухай мэргэжилтнүүд хэлдэг. Энэ нөхцөл байдлыг БОАЖ-ын сайд Д.Цогтбаатар газар дээр нь очиж үзээд холбогдох хүмүүст үүрэг даалгавар өгч зарим хүнд хатуу анхааруулга өглөө. Тухайлбал, Харгиад бохир ус нийлүүлдэг арьс ширний 23 үйлдвэр байдаг аж. Тэднийг ирэх тавдугаар сарын 1-ний дотор бохир усны асуудлаа шийдэхгүй бол үйлдвэрийг хаах хүртэл арга хэмжээ авахаар боллоо. Түүний тавьсан ганцхан үндсэн шаардлага нь Туул гол руу стандартад нийцсэн, цэвэршүүлсэн ус нийлүүлэх явдал хэмээв. Технологи шинэчлэх гарц, шийдэлд хэдэн төгрөг зарцуулах тооцоо судалгааг боловсруулаад товлосон хугацаанаас өмнө дахин уулзахаар болсон юм. Уулзалтын төгсгөлд сайд "Хэрэв байгаль орчин хариуцсан сайдад нь үйлдвэр хаах эрх байхгүй юм бол хянаж, шалгадаг албаныхантай нийлээд энэ байдалтай хатуу тэмцэнэ" гэж байлаа.