Өнөөдөр “Эх орончдын өдөр”. Эл өдрийг МАХН, МАН-ууд хамтран тэмдэглэж, найр тавилцаж байна.

Тэгвэл намуудын удирдлагууд болоод гишүүд, дэмжигчид нь цахим ертөнцөөр “төрсөн өдөр”-ийн мэндчилгээ дэвшүүлж, баяр хүргэсээр байгаа юм. Баянгол дүүргийн Засаг дарга асан, Иргэдийн хурлын төлөөлөгч Л.Амгалан ч "Эх орончдын өдөр"-ийг мартсангүй мэндчилгээ дэвшүүлэв. Гэвч түүний мэндчилгээ цахим ертөнцөд шуугиан тариад байна.

Тэрбээр Хятадын коммунист намын малгай өмсч, “Магнаг үсэгтэй туг” дууны аялгуун дор “Эх орныхоо төлөө амь биеэ хайрлалгүй тэмцсэн...” гэхчилэн тун албархаг мэндчилгээ дэвшүүлжээ.

Коммунист хувьсгалчийн дүрд хувирсан Л.Амгалангийн мэндчилгээ олны сонирхол татахаас илүүтэй дургүйцлийг төрүүлж байна. Учир нь түүний мэндчилгээнээс өширхсөн, дарангуйллыг сурталчилсан өнгө аястай үг, үйлдэл мэдрэгдэж байгаа төдийгүй Хятадын улаан армийн малгай өмссөн нь анхаарал татж, эсэргүүцэлтэй тулгарах шалгаан болов.  

Угтаа бол МАН-ынхан гаминг дарсан үйл явдлыг “Эх орончдын өдөр” гэж тунхагладаг. Гэтэл Л.Амгалан төлөөлөгч ийнхүү гамингийн малгай өмсч мэндчилгээ дэвшүүлсэнийг харсан хүмүүс “МАН-ынхан ардын хувьсгал биш Хятадын хувьсгал хийсэн юм биш үү” гэцгээн цахим ертөнцөд өөр өөрийн байр суурийг илэрхийлж байна. Түүнчлэн “Л.Амгалан төлөөлөгч баярын өдрөө намаа ч ганц сайхан хөөдлөөдөө”, “Хэн ингэж зөвлөг юм бол”, “Ямар соёлын довтолгоон биш дээ” гэцгээн дургүйцлээ илэрхийлж байна.