Үндэсний аудитын газар, Сонгуулийн ерөнхий хороо, Бүтргэл, статистикийн ерөнхий газраас сонгуулийн бэлтгэл ажил болоод цаг үеийн асуудлаар мэдээлэл хийлээ.

Сонгуульд зарцуулах зардлын дээд хэмжээг 3.4 тэрбум төгрөг байхыг  Үндэсний аудитын газраас тогтоосон. Харин нэр дэвшигчдийн хувьд тусдаа байхаар зардлын дээд хэмжээг тогтоож өгсөн байна. Ингэхдээ тухайн тойргийн хүн ам, газар нутгийн хэмжээнээс хамаарч харилцан адилгүй байх аж. Орон нутгийн ИТХ-ын зардлын дээд хэмжээг сонгууль болохоос 90 хоногийн өмнө тогтоох ёстой. Тиймээс орон нутгийн аудитын байгууллага сонгуульд зарцуулах зардлын дээд хэмжээг тогтоох ажлыг зохион байгуулах юм байна.

Манай улсад санал өгөх насны 2 сая 4 мянга 48 иргэн байна гэсэн урьдчилсан дүн гарчээ. Гэхдээ энэ тоо тодорхой хэмжээгээр хэлбэлзэж болно хэмээн Бүртгэл, Статистикийн газраас мэдээллээ. Шилжилт хөдөлгөөнийг санал авахаас 60 хоногийн өмнө буюу дөрөвдүгээр сарын 30-ны өдөр гэхэд зогсоох аж. Сонгуулийн хэсгийн хувьд 2091 хэсэг 21 аймаг 9 дүүрэг 332 суманд байгуулагдсан байна. Монгол Улсын сонгогчийн нэрийн жагсаалтыг www.burtgel.gov.mn цахим хуудаст байршуулсан бөгөөд сонгогч дээрх цахим хуудсанд хандан өөрийнхөө регистрийн дугаарыг хийгээд цахим код авах юм байна. Тэрхүү кодыг хийгээд өөрийнхөө мэдээлэл үнэн бодитой эсэхд хяналт тавих боломжтой болсон. Хэрэв зөрүүтэй мэдээлэл байвал оршин суугаа газрынхаа харьяа бүртгэл статистикийн хэлтэст хандаж зөрчлөө арилгуулах боломжтой. Мөн 1800 1890 утас руу залгаж зөвлөгөө авах боломжтой юм байна.

Энэ талаар болон бусад асуудлаар талаар Үндэсний аудитын газрын дэд дарга Б.Баттуяагаас тодрууллаа.

-Энэ жил нам эвслийн сонгуульд зарцуулах зардлын дээд хэмжээ гурав дахин буурсан байна. Ингэж буурах болсон шалтгаан нь юу вэ?

-2012 оны зардлын дээд хэмжээнээс буурсан. Учир нь 2012 онд сонгуулийн сурталчилгааг 35 хоног хийдэг байсан. Харин саяхан баталсан Сонгуулийн тухай хуульд зааснаар 18 хоног хийх заалттай болсон. Мөн зардал бууруулах болсон шалтгаан нь телевизийн эфирээр сонгуулийн сурталчилгаа явуулах хязгаарыг багасгаж өдөрт 60 минут байхаар хуульчилж өгсөн. Ухуулагч нарыг сайн дураар ажиллуулах, харин үйл ажиллагааны зардлыг тооцож оруулахаар болсон зэрэг нь нөлөөлж байна.

-Зардлын дээд хэмжээг хэтрүүлсэн тохиолдолд ямар арга хэмжээ авах вэ?

-Сонгуулийн зардалд хяналт тавих үүргийг ҮАГ хариуцаж байна. Сонгууль болсноос хойш нам, эсвэл, нэр дэвшигчид зардлын тайлангаа СЕХ-нд ирүүлэх ёстой. СЕХ тайланг хүлээж аваад ҮАГ-т ирүүлснээс хойш 90 хоногийн дотор аудит хийж баталгаажуулна. Хэрэв зардлын дээд хэмжээ хэтрүүлсэн байвал хуулийн дагуу арга хэмжээ авна.

Т.Энхэлээ