Манай урд хөрш БНХАУ болон БНХАУ-ын Өвөрмонголын өөртөө засах орны соёл, аялал жуулчлалын өдрүүдийн нээлтийн арга хэмжээ Монголын уран зургийн галерейд болж байна.

Энэ удаагийн соёл, аялал жуулчлалын өдрүүдийн арга хэмжээг “Хятад орныг танин мэдэх” гэсэн уриатайгаар хоёр улсын Элчин сайдын яамд, Хятадын төрийн зөвлөлийн хэвлэл мэдээллийн алба болон Монголын сэтгүүлчдийн нэгдсэн эвлэл, хэвлэл мэдээллийн байгууллагууд хамтран зохион байгуулж байгаа билээ.

Тус арга хэмжээнд Монгол Улсын БСШУС-ын сайд Ц.Цогзолмаа, БНХАУ-аас Монгол Улсад суугаа бүрэн эрхт элчин сайд Шин Хаймин тэргүүтэй олон зочид төлөөлөгчид оролцлоо.

Энэ үеэр “Инноваци нь биднийг ирээдүйд хөтөлнө” соёлын инновацийн бүтээгдэхүүний үзэсгэлэн дэлгэгдсэн байлаа. Үзэсгэлэнд голдуу Хятадын Өвөр монгол, Сычуань мужийн 36 соёлын аж ахуй нэгжийн 3000 гаруй соёлын инновацийн бүтээгдэхүүнийг харуулж, төрөл зүйл олон, урлаг, амьдралыг уялдуулснаар үндэстний онцлогийг харуулсан бөгөөд орчин үерүү уялдаа холбоо нь чиглэжээ. Энэ үзэсгэлэнгээр дамжуулж, Хятад, Монгол хоёр орны соёлын харилцаа, хамтын ажиллагааг эрчимжүүлж, хамтын хөгжил цэцэглэлтийг ахиулахад чиглэгдэж байгаа аж.

Мөн “Хүн байгалийн шүтэлцээ” Монгол анагаах ухаан эм бэлдмэлийн соёлын үзэсгэлэн,   “Нахиа” Хятад, Монголын ном солилцооны төслийн төслийн хүүхдийн номын үзэсгэлэн, “Үзэсгэлэнт сайхан Хятад орныг зураглая” уламжлалт ээрмэл, будмал, сүлжмэл, хатгамлын “биет бус соёл”-ын өвийн үзэсгэлэн тус тус болж байгаа юм.

БСШУС-ын сайд Ц.Цогзолмаа “Монгол Улсад суугаа бүрэн эрхэт элчин сайд Шин Хаймин болон энд хүрэлцэн ирсэн нийт зочид төлөөлөгчдөд Монгол Улсын Засгийн газрын нэрийн өмнөөс болон хувиасаа чин сэтгэлийн халуун мэндчилгээг өргөн дэвшүүлье. Монгол, Хятад хоёр улс маань хөрш орон. Олон жилийн харилцааны түүхтэй. Олон зуун жилийн туршид сайн хөршийн хамтын ажиллагааг хөгжүүлж ирсэн арвин баялаг түүхтэй билээ. Энэхүү уламжлалт харилцаа шинэ зуунд агуулга хэлбэрээр баяжигдан, нийгмийн амьдралын олон салбарыг хамран хөгжиж байна. Үүний хамгийн тод илрэл бол өнөөдөр хоёр орны улс төр, эдийн засаг, шинжлэх ухаан, техник технологи,спорт аялал жуулчлал, соёлын харилцаа улам бүр хөгжиж та бүхэн хэлэхэд таатай байна. 2019 он буюу ирэх жил Хятад, Монгол хоёр улсын маань хооронд дипломат харилцаа үүсэж хөгжсөний 70 жилийн түүхт ой болно. Өнөөдрийн энэхүү соёл, аялал жуулчлалын өдрүүдийн үйл ажиллагаа бол томоохон түүхэн үйл явдлын угтал болж буйд баяр хүргэж, амжилт хүсэж байна” гэв.  

Уг соёл инновацийн бүтээгдэхүүний үзэсгэлэн болон, “Үзэсгэлэнт сайхан Хятад орныг зураглая” уламжлалт ээрмэл, будмал, сүлжмэл, хатгамлын “биет бус соёл”-ын өвийн , “Хүн байгалийн шүтэлцээ” Монгол анагаах ухаан эм бэлдмэлийн соёлын,   “Нахиа” Хятад, Монголын ном солилцооны төслийн төслийн хүүхдийн номын үзэсгэлэнгүүд энэ сарын 05-наас 08-ний өдрүүдэд Монголын уран зургийн галерейд болох юм байна.

Эдгээрээс гадна 05,07-ны өдөр Баянзүрх дүүргийн нэгдсэн эмнэлэг дээр Хятадын Өвөр монголын Монгол эмч нарын төлбөргүй оношлогооны арга хэмжээ, Соёлын төв өргөөнд 05,06-ны өдрүүдэд “Найрамдлын солонго” уран сайхны концерт, 07-ны өдөр Сычуаний жүжиг “Цагаан могойн домог”-ийн тоглолт, Улаанбаатарын дуу бүжгийн чуулгын тоглолтын танхимд “Найрамталд хотуудын аялгуу” уран сайхны концерт, 04-08-ний өдрүүдэд кино театруудаар Хятадын кино өдрүүд, 06,07-ны өдрүүдэд ХААИС дээр Экологийн соёл иргэншлийн бүтээн байгуулалтын сэдэвт солилцооны арга хэмжээ, ШУТИС дээр Шинжлэх ухаан технологийн инновацийн сэдэвт солилцооны арга хэмжээ, 06-ны өдөр Новотол зочид буудалд Хятадын Өвөр монгол, Сычуаний аялал жуулчлалын байдлыг танилцуулах арга хэмжээ, 05-07-ны өдрүүдэд Монгол, Хятадын залуучууд Сагсан бөмбөгийн найрамдлын тэмцээн, 05-ны өдөр “Дэггүй аав” олон ангит Уран сайхны киног бэлэглэж нэвтрүүлэх ёслол, 08-ний өдөр “Талын дуу хоолой” радио нэвтрүүлж эхэлсний 5 жилийн ой болон радиогийн тухай танилцуулга, 05-ны өдөр “Солонго” сэтгүүл мэндэлсэн 25 жилийн ойн уншигчдын наадам болон Солонго хэвлэл мэдээллийн 3 дугаар форум зэрэг үйл ажиллагаанууд тус тус болох юм байна.

БНХАУ-аас Монгол улсад суугаа бүрэн эрхт элчин сайд Шин Хаймин “Хятад Монгол хоёр улс найрсаг харилцаатай хөршүүд билээ. Сүүлийн жилүүдэд, Хятад Монголын харилцаа хурдацтай хөгжлийн замд орж, хоёр талын өндөр, дээд хэмжээний уулзалт тогтмолжиж, улс төрийн харилцан итгэлцэл зогсолтгүй нэмэгдэн, бодит хамтын ажиллагаа тасралтгүй хөгжиж байгаа төдийгүй хүмүүнлэгийн болон соёл, аялал жуулчлалын харилцаа цэцэглэн хөгжсөөр байна. Хоёр оны харилцааны гол хөшүүрэг бол соёл, аялал жуулчлалын зам яалт ч үгүй мөн билээ. Энэхүү өдрүүд нь Хятад, Монгол хоёр улсын удирдлагуудын хүмүүнлэгийн салбар дахь солилцоог гүнзгийрүүлэхэд чухал нөлөө үзүүлэх болно  ” гэсэн юм. Энэхүү хоёр орны соёл, аялал жуулчлалын өдрүүд энэ сарын 09-нийг хүртэл үргэлжилнэ.

Л.Сайнбаяр