Нийслэлийн Засаг дарга буюу Улаанбаатар хотын захирагч С.Батболд өнөөдөр нийслэл хотод хийгдэж буй бүтээн байгуулалтын талаар мэдээлэл өглөө.
Тэрбээр “Санхүүгийн сахилга батыг сахиж ажиллаж байна. Өөрөөр хэлбэл олон дансаар үйл ажиллагаа явуулдаг байсан бол нэг данс болгосон. 2016 онд ажлаа авахад Улаабаатар хот 100 тэрбумийн өртэй байсан бол энэ онд өрийг тэглэсэн. Мөн хөрөнгө оруулагчдад зориулж хүнд суртлыг халах ажлын хэсэг байгуулан ажиллаж байна” гэв.
Нийслэл хот өнөөдрийн байдлаар 1.370.000 мянган хүн амтай аж. Энэ хүрээнд “Нийслэлийн эрх зүйн байдлын тухай хууль”-ийн шинэчлэлийг УИХ-ын ээлжит хурлаар хэлэлцүүлэхээр болжээ. Уг хууль батлагдсанаар нийгэмд тулгамдаад буй уур бухимдал, олон асуудлыг шийднэ гэж үзэж байна.
Сүүлийн жилүүдэд гэр хороолол хурдацтай тэлж байгаа. Нийслэлийн хүн ам, төвлөрөлийг бууруулахын тулд улаан шугам татсан байна. Хэрвээ улаан шугамнаас гадна талд сууршвал тог цахилгаанаас эхлээд ямар нэгэн үйлчилгээг үзүүлэх боломжгүй гэдгийг онцолж байгаа юм. Мөн нийслэл хотод шилжих хүсэлтэй иргэдэд дагуул хотуудад газар олгохоор төлөвлөжээ. Үүнд, Аэросити, Зуунмод, Майдар зэрэг багтаж байна.
Хотын түгжрэлийг бууруулахаар Нийслэлийн захиргааг Сонгинохайрхан дүүрэг рүү шилжүүлэхээр болсон бөгөөд хотын хөгжлийг Яармаг руу чиглүүлнэ гэдгээ хэллээ. Яармаг орчим газрыг Улаанбаатар хотын санхүү, бизнес, аялал жуулчлалын төв болгоно гэдгээ Нийслэлийн захирагч мэдэгдсэн юм.
Түүнчлэн Яармагийн шинэ гүүр ирэх арваннэгдүгээр сард ашиглалтад орох ба Сонсголонгийн гүүрийг ирэх оны арваннэгдүгээр сарын 1-ний өдөр гэхэд ашиглалтад оруулахаар төлөвлөж байна. Мөн нийслэлд үйл ажиллагаа эрхэлдэг томоохон худалдааны төвүүдийг шинэ дагуул хот руу нүүлгэх аж.
Жил бүр сургууль, цэцэрлэгийн асуудал гол сэдэв байдаг. Тэгвэл ирэх оны хичээлийн шинэ жилээс эхлэн ЕБС-ийг гурван ээлжэр хичээллэхийг нь болиулна гэсэн юм.
Өнөөдөр Засгийн газрын ээлжит хуралдаан болсон. Тус хуралдаанаар чухал хоёр сэдэв хэлэлцжээ. Тодруулбал, Зарханы чиглэлийн замыг хоёр эгнээ болгон засварлах байсныг дөрвөн эгнээ байхаар төлөлвлөжээ. Мөн Налайхын замыг дөрвөн эгнээ болгохоор шийдвэрлэсэн ба ирэх оны аравдугаар сар гэхэд ашиглалтад оруулахаар хэлэлцсэн байна.
Б.Лхам
