ӨМӨЗО-ны Өдрийн сонины харьяа “Солонго мэдээллийн төв”-өөс эрхлэн гаргадаг “Солонго” сэтгүүл нь 1993 онд анхны дугаараа гаргасан “Солонго” сэтгүүлийн 25 жилийн ойд зориулсан гурав дахь удаагийн форум “Blue Sky” зочид буудалд боллоо.

Уншигчдын хүсэлтээр “Солонго мэдээллийн төв”-ийн албан ёсны төлөөлөгчийн газрыг Монгол Улсад 2014 оны есдүгээр сард Улаанбаатар хотноо байгуулж, түүний дэргэд “Солонго” сэтгүүлийн редакцыг байгуулсан юм.

 Тэгвэл өдгөө уг сэтгүүлийн цар хүрээ улам бүр өргөжин тэлж “Солонго” сонин, “Solongonews.mn”, “Solongoru.mn” сайт, Солонго гар утасны аппликейшн, микроблог, вичат зэрэг мэдээллийн олон төрөлт хэрэглүүрүүд болж үйл ажиллагаагаа явуулж байгаа юм. Нийтлэлийн бодлогынхоо хүрээнд гадаад харилцаа, эдийн засаг, ард түмний зан заншил, аж амьдрал, соёл, хүмүүнлэгийн үйл ажиллагаа зэрэгт чиглэн нийтлэлээ боловсруулсаар ирсэн бөгөөд хот болон 21 аймгийн уншигчдыг жигд хамруулан ажиллаж байгаа юм.

Улмаар тус сэтгүүл хоёр улсын хамтын ажиллагааны болон өөр бусад соёлын арга хэмжээг зохион байгуулах зэргээр үйл ажиллагаагаа идэвхтэй явуулж байна. Чуулганы үеэр “”Миний мэдэх хоёр хөрш” зохион бичлэгийн уралдаанд байр эзэлсэн сурагчдын шагналыг гардуулан өгсөн юм.

Тус уралдааны Монгол бичгээр ирүүлсэн зохион бичлэгийн нэгдүгээр байрт 14 дүгээр сургуулийн сурагч Т.Хишигдэлгэр, хоёрдугаар байрт 14 дүгээр сургуулийн сурагч Э.Жавхлан, Э.Уянга, гуравдугаар байрт 14 дүгээр сургуулийн сурагч А.Энхтуул, С.Дарьсүрэн, Т.Халиун нар тус тус шалгарлаа. Харин Хятад бичгээр ирүүлсэн зохион бичлэгийн төрөлд нэгдүгээр байрт Энхжин, хоёрдугаар байрт Ля Жа Шин, Жан Мишээл, гуравдугаар байрт Мин Солонго, Мон Шан, Жү Юн Шу нар тус тус шалгарч шагналаа гардан авлаа.

Гурав дахь удаагаа зохион байгуулагдаж буй уг форумд ӨМӨЗО-ны “Солонго хэвлэл мэдээллийн төв”-ийн дарга Л.Наранхүү, нийтлэлч Б.Галаарид, Өвөр Монголын Өдрийн Сонины Хорооны дэд ерөнхий редактор Уртнаст нар оролцож уншигчид, мэргэжилтнүүдийн санал бодлыг сонсож, сэтгүүлийн чанарыг дээшлүүлэх зэрэг асуудлуудыг хэлэлцлээ.

Л.Сайнбаяр