"Fuckup" хэмээх нэгэн эвент монголчуудад танигдаад нэг жилийг үджээ. Өөрийн карьер, бизнес, аливаа нэг төслийн уналт, бүтэлгүйтэл, ялагдал түүнээс авсан сургамжийн тухай чин сэтгэлээсээ, үнэн бодитоор ярьдаг энэхүү цуврал үйл ажиллагааг үзэж, сонссоноор хэн нэгэнд магадгүй өөрийн амжилтыг ахиулахад түлхэц болж буй биз ээ. "Fuckup Nights Ulaanbaatar" эвентийг санаачлагч Ж.Мандхайтай хэсэг хором ярилцлаа.
-Удахгүй "Fuckup nights Ulaanbaatar" арга хэмжээний нэг жилийн ой болох гэж байгаа. “Fuckup nights" гэж юу болох талаар яриагаа эхэлье?
-Fuck гэдэг үг орсон болохоор Fuckup nights гэдэг нэрийг эхлээд сонсоход эвгүй байдаг. Гэвч fuckup нийлэмжийг бүтэлгүйтэл гэдэг утгаар хэрэглэдэг. Fuckup nights арга хэмжээ анх 2012 онд Мексикт үүссэн. Таван найз шар айраг уугаад ярилцаж суухдаа олж байсан санаа одоогоор дэлхийн 90 улсын 300 гаруй хотын залуусыг эгнээндээ нэгтгэсэн байна. Тэд амжилтын түүхээс залхаж, яагаад хүмүүс ерөөсөө бүтэлгүйтсэн түүхээ ярихгүй байгааг асууж. Тэгээд санаагаа дэлхий даяаар хэрэгжүүлж чаджээ. Би үүний талаар анх Казахстан найзаасаа сонсоход их сонирхолтой, яг манай залуучуудад хэрэгтэй эвент юм шиг санагдсан. Тэгээд өнгөрсөн оны есдүгээр сард энэ арга хэмжээг Монголд явуулах албан ёсны эрхээ авч, 9 сарын 14-нд анхны арга хэмжээг зохион байгуулж байлаа.
-Монголчууд хэр хүлээж авч байсан. Анх эхлэхэд хүндрэлтэй зүйл байсан уу?
-Шинэ содон л байсан байх. Анх илтгэгч нараа олоод, хүмүүсийн өмнө бизнес юмуу төслийн том алдаагаа чин үнэнээр нь чин сэтгэлээсээ олон хүний өмнө яриад өгөөчээ гэж гуйж ойлгуулахад арга туршлага дутсан байх. Нэг удаагийн арга хэмжээндээ дөрвөн хүнийг урьж оруулахыг зорьдог. Бид нэг удаа өөрсдөө бүтэлгүйтэж, УИХ-ын гишүүн Н.Учрал ирж оролцоно гэж хэлээд ирээгүй тохиолдол гарж байлаа. Бас бус жижиг сажиг юмнууд гарч байсан ч ерөнхийдөө бол дажгүй шүү.
-Fuckup nights арга хэмжээний гол зорилго нь юу вэ?
-Алдаа бүтэлгүйтлээсээ битгий ич, түүндээ битгий бууж өг, зарим тохиолдол алдсанаасаа болж юм зөв тийшээ эргэх, их юм ухаарах боломж ч гарч ирж болох юм гэсэн санаа. Монголчуудад хүнд муугаа үзүүлэхгүй гэсэн уламжлалт зан байдаг. Амжилтын түүхийг бид мэдэж байна, харин тэрэнд хүрэхийн тулд юуг, яаж даван туулсныг бусдад сонсгохыг бид зорьдог. Амархан олдсон, буруу замаар будаа тээж олдсон, хурдан түргэн, хөнгөн хуумгай олдсон зүйл угаасаа л амттай байдаггүй, удаан оршин тогтнож ч чадахгүй. Одоогоор заавал амжилтанд хүрсэн байх ч албагүй. Амжилт гэдэг хүн бүрийн хувьд өөрөөр хэмжигдэнэ. Гол нь хүний амьдралд тохиолдож буй олон алдаа бүтэлгүйтлээс хүн олон туршлагажиж, суралцаад цааш явах сэтгэлийн тэнхээтэй байх ёстой юм шүү гэдэг л зорилготой гэж хувьдаа ойлгосон.
-Нэг жилийн хугацаанд юу хийсэн бэ?
-Нэг жилийн хугацаанд бид сард нэг удаа нийт 11 эвент зохиож, нийт 43 хүнийг урьж авчран түүхүүдийг нь хамтдаа сонссон. Хэзээ нэгэн цагт ямар нэг юм хийгээд ямар нэгэн байдлаар бүтэлгүйтэж үзээд түүнийгээ бусадтайгаа үнэнгээсээ хуваалцах зоригтой хүмүүсийг урьж оролцуулсан. Тэднийг сонсохоор ирж байгаа үзэгчид ч гэсэн нэг оройг найзуудтайгаа хөгжилтэй өнгөрөөж, авах гээхийн ухаанаар хандаж, урам зориг авсан байх гэж найдаж байна. Цаашид бас энэ хөдөлгөөнийг ойлгож амьдралдаа зөв байдлаар хэрэгжүүлэх ч юм билүү.
-Нэг жилийн ойгоороо юу хийхийг төлөвлөөд байна, хэн хэн ирж оролцох бэ?
-Энэ удаагийнх дээр Монголын хамгийн том туршлагатай бизнесменүүдийг, оролцуулахыг зорьж байна. Тухайлбал, Монос группийн ерөнхийлөгч Л.Хүрэлбаатар, Таван Богд группийн ерөнхийлөгч Ц.Баатарсайхан, Худалдаа хөгжлийн банкны ерөнхийлөгч Б.Мэдрээ нар ирнэ. Арга хэмжээгээ энэ сарын 14-ны 19 цагт Централ тауэр-ын Sky-17 лоунжид хийхээр бэлтгэж байна. Бидний ерөнхий ивээн тэтгэгчээр “Aureus”, Ikon.mn сайт, Sky-17 лоунж ажиллаж байгаа. Мөн бид цаашид салбарчилж хийе гэж бодож байгаа. Бид саяхны нэг эвентээ Playtime наадам дээр хийсэн, дараа нь “Дэлхийгээр аялагч групп”-тай хамтарч, аялалд тохиолдсон бүтэлгүйтлийн талаар ярилцсан. Компаниуд болон альваа нэг салбартай хамтарч ажиллахад үргэлж нээлттэй.
-Яагаад энэ арга хэмжээг Монголын залуучуудад тохиромжтой гэж бодсон юм бол?
Энэ арга хэмжээний талаар анх сонсоод л надад ямар ч эргэлзээгүй шууд таалагдсан. Бид яагаад мэдээгүй юм бол, бусад улсын бараг бүх хотод нь зохион байгуулагдаж байгаа энэ эвент Улаанбаатар хотод ч гэсэн зохион байгуулагдах ёстой гэсэн бодол төрсөн. Хувийн амьдарлын бүтэлгүйтлээ ярьдаг биш бизнес төсөл, карьерийн бүтэлгүйтлээ дүгнэн яриад, сонсож буй хүмүүс тэндээс нь өөрт хэрэгтэй мэдээллээ аваад, магадгүй урьдчилан сэргийлэх, өөр дээр нь ирэхэд сэтгэлийн хаттайгаар даван туулж, цааш цуцалтгүй зүтгэж, өөрийн мөрөөдлөө биелүүлээ ч билүү. Заавал тэгэхгүй байлаа гэхэд, нэг оройг арай өөр юм сонсож зугаатай өнгөрүүлж яагаад болохгүй гэж. Одоо тэгэж юмаа ярихгүй, хэлэлцэхгүй, шүүмжлэхгүй, алдаа дутагдалаа хүлээн зөвшөөрөхгүй байгаад байвал хаашаа ч хол явж чадахгүй байх гэж бодож байна.
-Сонирхож байгаа залуус танай эвентэд хэрхэн оролцох вэ?
Манай Facebook Page (https://www.facebook.com/funUB/) нээс эвентийн талаарх ерөнхий мэдээлэллүүдийг авч болно. Нэг жилийн ойн мэдээллийг мөн (https://www.facebook.com/events/2118272941769142/) авч болно. Мөн энэ хөдөлгөөний талаар орчуулагдсан нийтлэлүүдийг сонирхон уншиж болно. (https://ikon.mn/opinion/16ym)
Р.Хишигжаргал
Сэтгэгдэл (1)