Монгол, Японы нийгэмлэгүүдийн төлөөллүүдийн хурал болж буйтай холбогдуулан Япон улсаас Монгол улсад суух онц бөгөөд Бүрэн эрхт Элчин сайд асан Таканори Шимизүтэй ярилцлаа.
-Монгол, Японы нийгэмлэгүүдийн төлөөлөл өнөөдөр хуралдаж байна. Уулзалтын гол ач холбогдол нь юу юм бэ?
-Энэ нь маш чухал. Яагаад гэвэл эдгээр Японы байгууллагууд Монголд янз бүрийн салбараар хамтарч ажиллаж байгаа боловч нэг асуудал тулгараад байгаа юм. Энэ Юу гэхээр ихээхэн гишүүд хөгширсөн байна. Гишүүний тоог нэмэгдүүлэхгүйгээр идэвхтэй ажиллана гэдэг хэцүү. Тиймээс 30 жилийн өмнөхтэй харьцуулахад үйл ажиллагааны хувьд доогуур унасан байна. Түүнийг идэвхжүүлэхийн тулд уг уулзалтыг зохион байгуулж байна. Үүнд, ямар асуудал тулгараад байгаа, түүнийг хэрхэн шийдвэрлэх гэдгийг ярилцах нь чухал байна.
-Тэгвэл цаашид хийх шаардлагатай гол ажлууд юу байгаа вэ?
-Бүх нийгэмлэгүүд өөр өөрсдийн онцлогтой бөгөөд хийх зүйл нь ч өөр л дөө. Жишээ нь Япон, Монголын найрамдлын нийгэмлэг нь нэлээд дээр үед зохион байгуулагдсан. Гадаад харилцааг хөгжүүлэхийн төлөө байгуулагдсан ч бид жил бүр монголын тухай эдийн засаг, улс төрийн янз бүрийн сурталчилгаа хийн ном хэвлэдэг. Японд суралцдаг Монгол залуус мөн энэхүү ажилд оролцдог юм. Цаашид хоёр орны Засгийн газрын дэмжлэг хэрэгтэй байна. Мөн энэхүү ажилд Япон залуусын сонирхлыг хэрхэн татах тал дээр хичээж ажиллаж байна.
-Монгол залуус дийлэнхдээ ямар чиглэлээр Япон улсад суралцаж байна вэ?
-Ихэндээ эдийн засгаар суралцдаг байсан бол сүүлийн үед техникийн салбараар суралцдаг оюутнууд нэмэгдэж байна. Түүнд нь их баярлаж байгаа. Мөн хоёр улсын засгийн газрын тохиролцоогоор 1000 орчим залуусыг техник технологийн чиглэлээр суралцуулах ажлыг дэмжиж байна. Олон залуус теникийн чиглэлээр суралцаж байгаа юм.
-Монголчуудаас Япон хүмүүсийн сурах зүйл нь юу байдаг вэ?
-Би 40 орчим жил Монгол хүмүүстэй харилцаа холбоотой байна. Анзаараад харахад Монгол залууст, Япон залуучуудад байхгүй өвүүд зөндөө байгаа юм. Зарим Япон залуус Монголд ирээд өөрчлөгдсөн байдаг. Тиймээс хоёр орны залуучуудын харилцааг нэмэгдүүлэх нь миний хийх ажил гэж бодож байна.
-Япончуудад танигдсан Монгол ямар өв байна вэ?
-Хамгийн танигдсан гэвэл Чингис хааныг мэдэхгүй Япон хүн гэж байдаггүй. Мөн бөх, морин хуур зэргийг сайн мэднэ.
-Японы эдийн засаг өөрөө хүчирхэг. Манай улстай олон жил харилцаа холбоотой байгаа таны хувьд Монголын эдийн засаг хүчирхэг болоход юу хэрэгтэй вэ?
-Би Монголын аялал жуулчлалыг судалж байгаа. Аялал жуулчлал бол Монголын бүхий л салбар дундаас хамгийн боломжтой нь гэж боддог. Уг аялал жуулчлалыг хөгжүүлж чадвал уурхайн салбарыг хөгжүүлснээс чухал. Жишээлбэл, тухайн уурхай нь ард түмэнд ашгаа өгөхгүй бөгөөд тодорхой хэдэн хүмүүст л хамаатай. Өөрөөр хэлбэл, Монголд хүн бүр уурхай гэж ярьдаг боловч энэ нь буруу гэж боддог. Уурхай хөгжих ёстой ч өөр салбараа хөгжүүлэх нь илүү ашигтай гэж үзэж байна.
Б.Лхам
