Хичээлийн жил, замын засвар үйлчилгээ, бүтээн байгуулалт хийгдэж байгаатай холбогдуулан үүссэн замын хөдөлгөөний ачааллыг бууруулах зорилгоор “Ачааллыг бууруулах ажлын хэсэг” хуралдаж хөдөлгөөн зохион байгуулалтын чиглэлээр тодорхой төрлийн саналуудыг солилцсон байна. Энэ хүрээнд замын ачааллыг бий болгож байгаа Энхтайвны өргөн чөлөө, Чингисийн өргөн чөлөөний авто замын ачааллыг бууруулах саналыг тус ажлын хэсэгт танилцуулж, ажлууд хийгдэж эхэлснийг Замын Цагдаагийн албанаас мэдээлж байна.

Тодруулбал, автобусны буудлыг өргөтгөх, шинэчлэх ажлууд хийгдэхээр болжээ. Тухайлбал Төв номын сангийн баруун талд байрлах автобусны буудлын замын доголыг авч, шулуун хэлбэрт шилжүүлснээр нийтийн тээврийн автобус заавал нэгдүгээр эгнээнд шилжиж орохгүйгээр шулуун явах боломжтой юм.

Мөн Жамъянгийн гудамжны /Blue sky төвийн урд зам/ замын хөдөлгөөнийг баруунаас зүүн чиглэлд нэг чигийн хөдөлгөөнтэй болгож Сөүлийн гудамж буюу  нэгдүгээр сургууль руу зүүн эргэх хөдөлгөөнийг хязгаарлаж байгаа юм.

ГХЯ-ны уулзвараас Төв шуудангийн уулзварын  хооронд хойд урсгалдаа 140 суудлын автомашин багтаж зүүн гар тийш гурван эгнээгээр Чингисийн өргөн чөлөө рүү эргэдэг. Энэ хөдөлгөөн Төв номын сангийн баруун урд талын явган зорчигчийн гэрлэн дохион дээр саатаж, Энхтайваны өргөн чөлөө Зүүнээс баруун, баруунаас зүүн тийшээ шулуун явах хөдөлгөөнд саад учруулдаг. Дээрх ачааллыг бууруулах зорилгоор Хүүхдийн ордны баруун уулзварт түр гэрлэн дохио байрлуулж зүүн тийш эргэх буюу Энхтайвны гүүр рүү эргэх нөхцлийг бүрдүүлж ажиллаж байна. Өөрөөр хэлбэл зурагт үзүүлснээр иргэд Хүүхдийн ордны баруун хойд уулзварт урагш буюу зүүн гар тийн эргэх нөхцлийг бүрдүүлж байна. Ингэснээр иргэд ГХЯ-ын уулзвараар Олимпийн гудамж руу эргэж Шангри-Ла төвийн уулзвараар баруун эргээд Гэндэнгийн гудамжаар зорчиж, Хүүхдийн ордны уулзвараар Энхтайвны гүүр рүү эргэх боломжтой.

Түүнчлэн Скайтел төвийн автобусны буудлыг Хүүхдийн ордны хойд талд шилжүүлэн байрлуулахаар болжээ. Энэ багшийн дээдээс Яаралтай түргэн тусламжийн төв буюу 103 руу зүүн эргэх нөхцлийг бүрдүүлэх аж.

Нэгдүгээр сургуулийн уулзвараас хойш Цэцэг төв рүү эргэх хөдөлгөөнийг хориглож, хойноос урагш чиглэлд нэг чигийн хөдөлгөөнтэй болгох ажил хийгдэж байна. Мөн ОХУ-ын Элчин сайдын яамны баруун талын авто замыг сөрөг хөдөлгөөнтэй болгож өөрчлөлт хийж байгаа юм. Ингэснээр Энхтайвны өргөн чөлөө дэх авто замын ачааллыг Сөүлийн гудамж руу тэнцвэржүүлэх боломжтой болно гэж үзэж байна.

Нэгдүгээр сургуулийн урд талын замын зохион байгуулалтыг өөрчилж аж ахуй нэгжүүдийн зогсоол хэлбэрээр ашиглаж буй нийтийн эзэмшлийн зам талбайг зорчих хэсэг болгон өргөтгөж, дагуу хэлбэртэй авто зогсоолыг байгуулж хөдөлгөөний урсгалыг сайжруулахаар ажиллаж байна.

Зарим уулзваруудын гэрлэн дохион дээр хугацаа байрлуулах ажил хийгдэхээр болжээ. Гэрэл дохион дээр хугацаа байрлуулснаар уулзварын нэвтрүүлэх чадвар сайжирдаг учраас эхний ээлжинд Энхтайвны өргөн чөлөө дэх дөрвөн уулзварт байрлуулах аж.

Б.Лхам