Жүжигчин А.Туяатай ярилцлаа.

-Ярилцлагаа сүүлийн үеийн уран бүтээлээс тань эхлэе. “Дундын бүсгүй” шоу драмд та ямар дүр бүтээж байна. Таны бүтээж байгаа дүрийн онцлог?

-Манай жүжиг хоёр өөр жанраас бүрдэж байгаа. Би энэ удаагийн бүтээлдээ урьд өмнө нь бүтээж байгаагүй дүрээ бүтээж байна. “Эрх мэдэлтэй хүний охин, түүнд мэдлэг боловсрол гээд бүх юм байна. Нэг л удаа амьдрахаас хойш юу ч хамаагүй хийнэ гэсэн бодол эрмэлзлэлтэй тийм бүсгүйн дүр байгаа. Энэ дүрээр гарах нэг чухал санаа нь зарим хүн ганц л амьдрах юм шиг хувиа бодож, маргааш хамаагүй гэсэн буруу ойлголттой байдаг. Гэтэл цаана нь өөр амьдрал явагдаж байдаг учраас бодууштай.

-Энэ жүжгийн нийгэмд хүргэх мессеж нь юу вэ?

-Би саяхан инстаграмийнхаа зурганд хүн амьдарвал утга учиртай амьдрах ёстой. Мал адгууснаас долоон дор амьдарч байна үүнийг утга учиртай амьдрах гэхгүй байх гэж бичсэн. Гэтэл хүмүүс утга учиргүй амьдрал гэж ямар амьдралыг хэлээд байна гэж их асуусан л даа. Манай жүжгийг үзээд тэр ойлголтуудыг авна. Хүн “амьдарч байна” гэж амьсгаатай байгаагаа л тэгэж хэлээд байдаг байх. Гэтэл амьдралын утга учир гэдэг өөр зүйл. Зарим хүмүүс, залуучууд утга учиргүй бүр адгуус малнаас долоон дор амьдарч байна. Тухайлбал, хэтэрхий их хартай, хамаа намбаагүй сексийн амьдрал, хүчирхийлэл, хар тамхи гэдэг юм уу энэ бүхэн зарим залуучуудын амьдралд тэр чигтээ байна. Үүнийг зөв, буруу гэх дүгнэлтээ үзэгчид өөрсдөө хийх байх.

-Хүчирхийлэл гэлээ, охид, эмэгтэйчүүдийн хүчирхийллийн талаар сүүлийн үед их ярих болсон. Таны бодлоор хүчирхийлэл ихсэх болсон шалтгааныг юу гэж харж байна, ер нь ирээдүйн найз залуу, нөхөртөө ямар цензур тавих хэрэгтэй вэ? Энэ асуултыг яагаад танаас асууж байна гэхлээр та ханиа сонгох тад дээр их нухацтай ханддаг юм шиг санагдлаа?

-Мэдээж хүн болгон л ирээдүйн ханьдаа цензуртай байдаг байх. Миний хувьд цензур тавилгүй харин сайн танихыг л хичээдэг. Хүнийг танъя гэвэл удаан хугацаа хэрэгтэй.Юу юугүй хүүхдийг нь гаргачихгүй хамт амьдарч байж илүү танина. Ингэж байж л зөв хүнээ сонгох юм шиг санагддаг. Тэгэхгүй тухайн үеийн сэтгэл хөдлөлөөрөө миний мөрөөдөж байсан хүн байна даа гээд сонгочихдог. Гэтэл хамт амьдраад ирэхээр ойлголцохгүй олон асуудал гарч гэр бүл салалт, хүүхэд өнчрөх асуудлууд үүсдэг, мөн гэр бүл салалтын ард ихэвчлэн эмэгтэйчүүд хохирч үлддэг юм шиг санагддаг. Ямар сайндаа одоо бонустай эмэгтэй, бонустай хүн алга гэж ярьдаг болсон байна шүү дээ. Энэ бол маш харамсалтай зүйл. Тийм учраас гэр бүл зохиож байгаа залуус маань ерөнхийдөө бодож, нухацтай хандах хэрэгтэй болов уу. 

-Та хосууд гэрлэхээсээ өмнө нэг гэрт орж, хамт амьдрах хэрэгтэй талаар ярьлаа. Гэтэл манай нийгмийн хандлага эсэргээрээ юм шиг?

-Энэ чинь их буруу ойлголт л доо. Хэт баригмал байх шаардлагагүй.Хуримаа хийхээсээ өмнө хамт амьдарч, нөгөө хүнээ таниад салах тохиолдол зөндөө байдаг. Үерхэж байхдаа л ээж аавтай нь танилцаж мэдэж байх хэрэгтэй юм шиг санагддаг. Би ер нь хуучинсаг үзэлтэй хүн байж магадгүй. Гэхдээ энэ асуудал дээр нухацтай хандахыг хичээдэг. Энэ бас эцэг эхийн хүмүүжил л дээ.

-Гэр бүлийнхээ талаар ярихгүй юу, ээж аав тань таныг хэрхэн хүмүүжүүлдэг байсан бэ?

-Би ээж, ааваасаа дөрвүүлээ, айлын дунд охин. Аав ээж маань жирийн л нэг эгэл хүмүүс бий. Аав маань геологич, ээж маань геофизикч мэргэжилтэй. Би хотод төрж өссөн. Ээж аав маань биднийг соц нийгмийн хүмүүжлээр өсгөсөн. Гэхдээ зөвхөн ээж, аавын хэлснээр болоод байхгүй, ер нь бид эргэн тойрны амьдралаасаа л суралцаж байдаг шүү дээ.

-Таныг багадаа үг дуу цөөтэй, бүрэг хүүхэд байсан гэж сонссон. Одоо та хэр өөрчлөгдсөн бэ, урлагийн нөлөө бас байгаа байх?

-Багадаа маш даруухан охин байсан. Гэхдээ даруухан хэрнээ сургуулиас зохион байгуулагдсан бүхий л юманд оролцож байдаг идэвхтэй охин байсан. Өөрчлөгдсөн гэвэл мэдээж хүн цаг хугацааны явцад өөрчлөгдөж л байгаа л даа. Бүх юм өөрчлөгддөг. Тийм учраас их бага хэмжээгээр зөв зүйлрүүгээ өөрчлөгдсөн байж магадгүй буруу ч зүйлрүүгээ өөрчлөгдсөн байж магадгүй. Гэхдээ хүний хүмүүжил эцэг эхийн хүмүүжил гэдэг ерөнхийдөө суурь хүмүүжил байдаг. Манай ээж, аав хоёр биднийг буруугаар, задгай хүмүүжүүлж байгаагүй. Хатуу чанга ээж, аавтай.

-Та эрч хүчтэй, бие даасан, эрхэмсэг эмэгтэйн дүрүүдийг ихэвчлэн бүтээдэг. Амьдрал дээрх Туяа ямар вэ?

-Би их үг дуу цөөтэй, даруухан талдаа. Гэхдээ ажил мэргэжлийн онцлогоос хамаарч нүүрэмгий байх нь өөр. Түүнээс амьдрал дээр ер нь их үг дуу цөөтэй. Одоо энэ өрөөнд байгаа гурван бүсгүй дундаа бол би хамгийн дуу цөөн, даруухан нь.

-Тэгвэл их дотогшоогоо хүн юм?

-Үгүй дотогшоогоо биш байгаа нь л тэр байхгүй юу.

-Таныг жүжигчин мэргэжилийг сонгоход юу нөлөөлсөн бэ?

-Цэвэр миний өөрийн сонирхол байсан. Ер нь ээж, аав хоёр маань ингэж болохгүй, тэгэж болохгүй, чи ийм байх ёстой гэж хэлдэггүй. Хүүхдүүдтэйгээ сайн ярилцдаг, юунд сонирхолтой тэрийг нь хүлээн зөвшөөрдөг байсан. Ямар сайндаа  намайг  эмч болгох гээд сургуультай нь ярьчихсан байхад нь би жүжигчин болно гээд жүжигчний ангид шалгалт өгөөд орсон. Багаасаа шийдвэрийг зоригтой гаргадаг  түүндээ баттай зогсож чаддаг байсан.Тиймээс гаргасан шийдвэр маань ч буруу байгаагүй.

-Драмын урлагт орох нь ихэнх жүжигчдийн хүсэл байдаг.Та яагаад хошин урлагийг сонгосон бэ?

-Би багаасаа л Одончимэг, Аглуу ах хоёрыг үзэх дуртай, фэн нь байсан. Ямар гоё азтай хүмүүс энэ хүмүүстэй цуг ажиллаж хажууд нь хараад байж байдаг байнаа гэж боддог байлаа. Өөрийгөө тэдний дунд орно гэж төсөөлсөн ч үгүй. Гэтэл СУИС-ийн гуравдугаар курст байхад Х-ТҮЦ”-ээс ажлын санал ирсэн. Ёстой нөгөө нэг хөөх гэж боддог байсан хүмүүсийнхээ дэргэд нь суугаад, оролцоод явахдаа энд л би байх ёстой юм байна гэж боддог байсан. Ангийн багш маань намайг драмд оруулах сонирхолтой, драмд шалгалт өгөхийг зөвлөж байсан.Бас л өөрийнхөөрөө шийдвэр гаргадаг хүн чинь тэр зангаараа л явсан. Анхнаасаа л драмд ороё гэсэн бодол байхгүй байсан одооч хэвээрээ.

-Та өөрийгөө хувь хүн талаас нь тодорхойлбол юу гэж тодорхойлох вэ?

-Их л өөрийнхөөрөө, жаахан зарчим ч хүн.

-Зарчим ч гэснээс та хэр цаг баридаг вэ?

-Энэ асуудал дээр өөртөө маш шүүмжлэлтэй ханддаг. Миний өөрөө өөртэйгөө тэмцдэг зүйлийн нэг.  Яг чухал юман дээрээ цагаа барилгүй л яах вэ.

-Төлөвлөгөөгөө яаж боловсруулдаг вэ?

-Би долоо, 10 хонгийнхоо ажлын төлөвлөгөөг  тэмдэглэлийнхээ дэвтэр дээр бичээд явдаг. Тэгээд түүнийхээ дагуу ажилладаг.

-Таньд бусдын мэддэггүй нуугдмал авъяас бий юу?

-Айхтар нуугдмал авьяас байхгүй. Гэхдээ би интерер дизайнд сонирхолтой. Миний тохижуулсан янз бүрийн интрер хүмүүст их таалагддаг. Тиймээс би интерерд гайгүй авьяастай гэж боддог шүү.

-Таныг чимдэг дотоод болон гадаад зүйл юу гэж боддог вэ?

-Үнэнч, тууштай зан чанартай. Янз бүрийн юманд урваж шарваад хэлсэн ярианаасаа зөрнө гэдэг зүйл байхгүй. Харагдах байдлаасаа чимдэг зүйл инээмсэглэл. Чин үнэнээсээ инээж чаддаг.

-Таныг бясалгал хийдэг гэж сонссон. Яагаад бясалгах болсон бэ?

-Бясалгал хийдэг байсан. Бясалгал оюун санааны тайвшрал, ухааныг олж авдаг гэж боддог. Ядаж л бясалгал хийдэг гэхээр хүмүүсийн ойлголт шал өөр болсон шүү дэ одоо бол ядаж л надад юу хэрэгтэйг мэднэ. Ямар байхдаа гоё байдаг, юу хэрэглэхээр бие биш байгаад байна энэ мэт зүйлээ мэддэг. Сайн, муугийн тухай мэддэг хэрнээ тэрийгээ барьж дийлдэггүй. Бясалгал хийснээр хүн шал өөр болдог.Өөрийгөө улам илүү таньж, мэдэрч эхлэдэг.

-Та ямар нэгэн зүйл сүсэглэдэг үү?

-Ямар нэгэн шашин шүтлэггүй. Зүгээр хөх тэнгэр хараад бол шүтнэ. Хөх тэнгэр ээж аавыгаа шүтнэ.

-Та хэр зоригтой хүн бэ? Алдаа гаргахаас айдаг уу?

-Алдаанаас айдаггүй байсан, одоо л жаахан айдаг болсон. Ер нь шударга хүн байсан.

-Стилээ яаж бүрдүүлдэг вэ?

-Өөрийнхөө таалагдсан, өмсмөөр байгаа юмаа өмсдөг. Түүнээс биш стиль хөөцөлдөөд байдаггүй. Өөртөө эвтэйхэн, биед амар хувцас л ихэвчлэн өмсдөг.

-Эмэгтэй хүний хэрэглээ өндөр байдаг. Ялангуяа олны танил хүнд хэрэглээ их өндөр байдаг байх. Одоо та санхүүгээ яаж зохицуулдаг вэ?

-Санхүүгийн тал дээр эрх чөлөөнд хүрсэн гэж худлаа ярихгүй. Мэдээж олсон мөнгөө зөв зарцуулж байх хэрэгтэй. Хэзээ өмсөх гээд байгаагаа  мэдэхгүй хэрэгтэй хэрэггүй олон зүйл цуглуулаад байдаггүй.

-Таны бүтээж байгаа дүрүүд ихэвчлэн ихэмсэг эмэгтэйн дүр байдаг. Энэ таны биеэ авч явах соёлтой холбоотой юу?

-Магадгүй. Намайг хүмүүс их зантай гэж хардаг гэсэн. Харагдах байдал ийм боловч өөрийгөө их л нийтэч хүн гэж боддог.

Р.Хишигжаргал