Өнгөрсөн амралтын өдрүүдэд Тээврийн цагдаагийн алба нийт 645 дуудлага хүлээн авснаас 473 нь зам тээврийн ослын шинжтэй дуудлага иржээ. Бүртгэгдсэн осол, хэргийн улмаас 14 хүн гэмтэж бэртсэний гурав нь бага насны хүүхэд байна.
Мөн согтууруулах ундааны зүйл хэрэглэсэн үедээ тээврийн хэрэгсэл жолоодсон 99 зөрчлийг илрүүлэн саатуулжээ. Амралтын өдрүүдэд зам тээврийн осол, хэргийн нөхцөл байдал өмнөх өдрүүдийн нөхцөл байдалтай харьцуулахад харьцангуй тайван байсан бөгөөд “Автомашингүй өдөр”-өөр зам тээврийн ослын дуудлага мэдээлэл 40 хүртэл хувиар буурсан байна.
Монгол улсын Замын хөдөлгөөний дүрмийн шинэчилсэн найруулга арваннэгдүгээр сарын 1-ний өдрөөс хэрэгжиж эхлэх бөгөөд уг дүрэмд Явган зорчигчийн амь насыг хамгаалахад чиглэсэн дараах нэмэлт өөрчлөлтүүд орсон байна. Тухайлбал,
Явган хүмүүс харанхуй үед зам тээврийн осолд өртөх явдлыг бууруулах үүднээс дүрмийн 5.2-т "Харанхуй үед гэрэлтүүлэггүй замд болон үзэгдэлт хангалтгүй нөхцөлд зорчих хэсгийн зах буюу хөвөөгөөр явах тохиолдолд явган зорчигч нь жолоочид харагдах нөхцөлөө сайжруулах үүднээс аль болох тод гэгээлэг өнгийн, боломжтой бол гэрэл ойлгох шинж чанар бүхий хувцас хэрэглэл, эд зүйлстэй явбал зохино" гэсэн зөвлөмжийн чанартай заалтыг нэмж тусгасан бөгөөд энэ шаардлагыг европын ихэнх орон замын хөдөлгөөний аюулгүй байдлын тухай хууль тогтоомждоо тусган хэрэгжүүлж байна.
Мөн дүрмийн 27.2-ын "б"-д "өөрийн үйлдлийг хянах чадваргүй согтуурсан, мансуурсан байдалтай буюу сэтгэцийн өвчтэй хүнийг харгалзах хүнгүйгээр замын хөдөлгөөнд явганаар оролцуулахгүй байх"-ыг иргэн, хуулийн этгээдэд үүрэг болгосон бөгөөд энэ нь тэдгээр хүмүүсийн аюулгүй байдлыг хамгаалахад чухал ач холбогдолтой заалт болно.
Эх сурвалж: Тээврийн цагдаагийн алба
Сэтгэгдэл (1)