Хөдөлмөрийн Үндэсний Нам /ХҮН/-аас 2016 оноос хойш тус намын удирдлага, дотоод зохион байгуулалтад бий болсон үйл явдлын талаар мэдэгдэл хийлээ.
Тодруулбал, тус намын Төлөөлөх төв байгууллагын 2016 оны нэгдүгээр сарын 17-ны өдрийн хурлаар С.Ганбаатарыг намын даргаар сонгосон. Гэвч С.Ганбаатар нь намын дүрмийг ноцтой зөрчсөн үйлдэл удаа дараа гаргасаас үүдэн тус намд дотоод зөрчил бий болоод байгаа гэдгийг хэлж байна.
Түүнчлэн “нам нь дотоод зөрчилтэй” гэх шалтгаанаар Монгол Улсын Дээд шүүхийн 2016 оны гуравдугаар сарын 18 болон 2016 оны дөрөвдүгээр сарын 15-ны өдрийн хуралдаанаар ХҮН-ын даргыг улсын бүртгэлд бүртгэхээс татгалзжээ.
Харин С.Ганбаатар 2017 оны тавдугаар сард МАХН-ын гишүүн болсноор тус намын дотоод зөрчил арилсан аж. Тиймээс Монгол Улсын Дээд шүүхийн 2017 оны зургадугаар сарын 7-ны өдрийн хуралдаанаар Б.Найдалааг ХҮН-ын даргаар улсын бүртгэлд бүртгэх шийдвэр гаргажээ.
Улмаар 2017 онд ХҮН нь гишүүдийн шинэчилсэн бүртгэлийг зохион байгуулж, энэ оны гуравдугаар сарын 25-ны өдөр намын Их хурлыг хуралдуулсан байна. Намын Их хурлаар намыг бодлогын нам болгох, Намын дарга болон Удирдах Зөвлөлийн бүрэлдэхүүнийг намын Их хурлаас томилдог болох зэрэг томоохон өөрчлөлтүүдийг хийж, намын дүрэмдээ тусгах шийдвэр гаргасан тухайгаа мөн дурдлаа.
Монгол Улсын Дээд шүүхийн энэ оны тавдугаар сарын 14-ний өдрийн хуралдаанаар “… намын Их хурал хүчин төгөлдөр болсон, … намын дүрэм нь Монгол Улсын Үндсэн хууль, Улс төрийн намын тухай хууль болон бусад хуулийг зөрчөөгүй” гэж үзсэн тул намын Их хурлаас гаргасан шийдвэрүүдийг баталгаажуулж, Хөдөлмөрийн Үндэсний Намын дүрмийг улсын бүртгэлд бүртгэжээ.
Ингэснээр Хөдөлмөрийн Үндэсний Намын удирдлага, дотоод зохион байгуулалттай холбоотой үүссэн зөрчил бүрэн шийдэгдэж, манай нам нь Монгол Улсын хууль эрх зүйн хүрээнд үйл ажиллагааг хэвийн явуулах боломжтой болсон аж.
Хөдөлмөрийн Үндэсний нам
Сэтгэгдэл (16)