Энэ оны дөрөвдүгээр сарын 13-ний өдөр Булган аймгийн Сэлэнгэ суманд гарсан ой хээрийн түймрийг унтраахаар очсон гал сөнөөгч дөрвөн залуус гал түймэрт өртөж түлэгдсэн билээ. Тэдний нүүр, нуруу, хонго, хөл, гарын хуруунууд нь түлэгдсэн бөгөөд одоогоор гэмтлийн зэргийг бүрэн тогтоогоогүй байгаа юм. Тэгвэл өнөөдөр ажил үүргээ гүйцэтгэж яваад эрүүл мэндээрээ хохирсон Онцгой байдлын алба хаагчийн ар гэрийнхэн болон “Босоо хөх Монгол” ТББ-тай хамтран өнөөдөр хэвлэлийн хурал хийлээ. Энэ үеэрээ хохирогчийн гэргий г.Мөнгөнцэцэг "Би Монгол Улсын Ерөнхий сайд У.Хүрэлсүхэд 2019 оны долдугаар сарын 1-нд "Нөхрийн минь эмчилгээнд тус болооч" гэсэн агуулга бүхий өргөдөл өгсөн. Гэтэл миний өргөдлийг ЗГХЭГ-ын дарга Л.Оюун-Эрдэнэд шилжүүлсэн гэсэн. Ингээд Шадар сайдад шилжүүлсэн сураг гарсан боловч хариу өгөөгүй. Тусалсан зүйд алга" гэдгийг мэдэгдсэн юм.

Харин “Босоо хөх Монгол” ТББ-ын тэргүүн Г.Ганхуяг “Онцгой байдлын газрынхан Алба хаагчдынхаа эрх ашгийн төлөө хамгаалахыг эрх бүхий албан тушаалтнуудаас хүсэж байна. Төрийн ажил хийж яваад, эрүүл мэндээрээ хохирсон залуучуудад туслахыг монголчууддаа урилж байна. Энэ хэрэг явдал энэ оны дөрөвдүгээр сарын 13-ны өдөр болсон. Дөрвөн залуу гал унтраахаар явсны нэг нь Э.Үнэнбат. Одоо байгаа байдал нь нүд халтирмаар болсон. Ар гэрт эмчилгээний мөнгө байхгүй, орон гэр үр хүүхдээ тэжээж чадахаа байсан, хоёр гар нь мэдээгүй боолттой, сэтгэлээр маш их унасан. Энэ  чигтээ үхэх минь яав даа гээд уйлаад сууж байна. Одоо эмчлүүлэхээр ирсэн байгаа юм байна. Э.Үнэнбатын ард дөрвөн хөөрхөн хүүхэд байгаа” гэлээ.

Э.Үнэнбатын эхнэр г.Мөнгөнцэцэг "Манай нөхөр Онцгой байдлын албанд 19 ажил ажилласан. Бид хоёр гэр бүл болоод 17 дахь жил болох хугацаанд дөрвөн сайхан хүүхдийн ээж, аав болсон. Албан үүргээ гүйцэтгэж явсан хүн өнөөдөр ард түмнээсээ гуйлга гуйж байна. Онцгой байдлын алба хаагчдад эрсдэлийн, даатгалын, амь насны хууль гэж байдаггүй юм байна.

Одоогоор нөхөр маань ГССҮТ-д хэвтэн эмчлүүлж байна. Нэг удаа арьс нөхөх хагалгаанд орсон. Гарын арван хуруун нь ямар ч ажиллагаагүй болж, ар гэрийнхээ асаргаанд байна. ОБЕГ-аас нэг сая төгрөгийн тусламж үзүүлсэн. Орхон аймгийн Засаг дарга тус тус сая төгрөгийн тусламж үзүүлсэн. Өөр бидэнд ангийнхан болон ах дүү нар тусалсан.

БНСУ-ын олон эмнэлэгт хандсан. Эмчлэх боломжтой гэсэн хариу өгсөн. Гэхдээ нэг удаагийн хагалгаагаар шийдэгдэхгүй гэж хэлсэн. Тиймээс нөхрийн минь эмчилгээний зардлыг шийдэж өгөөч ээ гэж УИХ, Засгийн газар, Монгол Улсын Ерөнхийлөгч Х.Баттулга, Ерөнхий сайд У.Хүрэлсүх нарт хандаж байна” гэлээ.