Үүрэн холбооны компаниудаас "Мобиком корпораци" хэрэглэгчдийн зүгээс хамгийн шүүмжлэл хүртдэг. Үйлчилгээний төлбөр хэт өндөр байна, нүд хуурсан урамшуулалтай гэсэн шүүмжлэл бараг өдөр бүр гардаг гэхэд хилсдэхгүй. Тэгвэл Шударга өрсөлдөөн хэрэглэгчийн төлөө газраас үүрэн холбооны компаниудад шалгалт хийж, торгуулийн арга хэмжээ авсан талаар өнгөрсөн зургадугаар сард мэдээлэл хийх үеэрээ “Мобиком корпораци” хэрэглэгчидтэй байгуулсан стандарт гэрээний нөхцөлүүд нь хэрэглэгчийн эрхийг дордуулсан байна. Түүнчлэн багц болон үйлчилгээнийхээ өөрчлөлтийн талаарх мэдээллийг хэрэглэгчдэдээ хүргэж ажилладаггүй, тодорхой бус байдаг” зэрэг зөрчил илэрсэн. Энэ шалгалтыг прокурорын хяналт дор хийсэн. Ингэснээр "Мобиком корпораци" ХХК-ийн хэрэглэгчийн эрхийг хохироосон гэрээг хүчингүй болгож, 20 сая төгрөгийн торгууль ногдуулсан гэдгийг мэдэгдсэн юм. Энэ шийдвэр нь ёстой л "Загатнасан газар маажна" гэгч болж, иргэд талархан хүлээж авсан юм. Учир нь үүнээс өмнөхөн "Мобиком" корпораци байрны түрээсээ төлөлгүй таван сар болсон талаарх мэдээлэл өнгөрсөн тавдугаар сард олон нийтийн сүлжээгээр цацагдсан. Энэ нь ч иргэдийн дургүйцлийг багагүй төрүүлээд байв.

Гэтэл энэ асуудалтай холбогдуулан “Мобиком корпораци” ХХК зарим хэвлэл мэдээллийн хэрэгслүүдэд шаардлага хүргүүллсэн байна. Тодруулбал, тус компанийн зүгээс “Манай компани нь 2007 оноос эхлэн Монтрейд ХКК-ний өмчлөлийн оффис үйлчилгээний зориулалттай барилгыг “Ньюком протери” ХКК-тай байгуулсан дамжуулан түрээслэх гэрээний үндсэн дээр түрээслэн хууль ёсоор үйл ажиллагаа явуулж ирсэн. Улмаар “Ньюком протери” гэрээнд заасны дагуу түрээсийн төлбөрийг цаг тухайд нь төлж байсан. Монгол Улсын иргэний хуулийн 318.1-д заасны дагуу манай “Мобиком корпораци” ХХК нь Монтрейд ХХК-тай түрээсийн гэрээ байгуулсан удаагүй бөгөөд ямар нэгэн гэрээний эрх зүйн харилцаанд ороогүй. Тиймээс Монтрейд ХХК манай байгууллагаас түрээсийн мөнгө нэхэх ямар ч үндэсгүй юм. Түүнчлэн шууд нэг талын мэдээлэлд үндэслэн компанийн удирдлагуудыг авлигын шинжтэй үйлдэлд холбогдуулан бичсэн нь олон нийтэд компанийн нэр хүндийг унаган, бизнесийн үйл ажиллагаанд саад болох гэсэн санаатай үйлдэл гэж бид үзэж байна”.

Тиймээс энэ мэдээллийг тараасан нэр бүхий хэвлэл мэдээллийн байгууллагуудыг наймдугаар сарын 2-ны өдрийн хугацаанд багтан залруулга мэдээ олон нийтэд мэдээллэхийг шаардсан юм. Хэрэв заагдсан хугацаанд мэдээллийг түгээгүй толхиолдолд хуулийн байгууллагад хандана гэжээ.

Харин энэ тал дээр хэвлэл мэдээллийн байгууллагын төлөөллүүлд “Бодит зүйлийг ил болгосны залруулга гарга, хуулийн байгууллагад хандана гэх нь өрөөсгөл. Ийм байж болохгүй. Энэ бол хэвлэн нийтлэх эрхийг боомилсон хэрэг” гэдгийг илэрхийлээд байна.

Б.Лхам