Монгол Улсын Засгийн газраас хэрэгжүүлж байгаа Улаанбаатар-Дархан чиглэлийн 204.11 км авто замын Цайдмаас Дархан хотын тойрог хүртэлх 30.5 км замын ажил сар гаруй үргэлжилж байна. Олон улсын санхүүжилтээр хийгдэж байгаа учир энэхүү зам засварын ажилд Энэтхэгийн ICT компани хяналт тавьж байна. Төсөл нэг жилийн хугацаатай явагдах уг төслийн улмаас Дарханы түр зам их хэмжээгээр эвдэрсэн нь иргэдийг бухимдуулаад буй. Тэгвэл Зам тээврийн хөгжлийн яамнаас "Дархан-Азза" төрийн өмчит хувьцаат компанид түр замыг тодорхой хэсэгт хааж, хуучин замаар нь зорчуулах, бороо хуртай үед ачааллыг нь тэнцүүлэхээр чиглэл өгсөн байна. Гэвч гүйцэтгэгч компанитай гэрээ байгуулаагүй, төсөв хөрөнгө байхгүйгээс шалтгаалан 40 гаруй хоногийн хугацаанд түр замын арчлалт хамгаалалт орхигдсон байна. Тиймээс харъяа яамнаас түр замын засварт зарцуулагдах хөрөнгийг шийдвэрлэсэн бөгөөд удахгүй түр замыг засварлах, ажил гүйцэтгэх гэрээ байгуулахаар болжээ. 

Тодруулбал, зам засварын ажил зургадугаар сарын 17-нд эхэлсэн. Ажлын явц 4-6 хувьтай байна. Осол аваар их гардаг есөн цэг дээр нийт 453 хүн, 267 ширхэг техник хэрэгсэл ажиллаж байна. Засвар хийгдэх замын урт 202,3 км. Энэ замаар зорчуулах үүднээс 5, 10 км-аар хэсэгчилж засаж байгаа аж. Нэн тэргүүнд хөдөлгөөний аюулгүй байдлыг хангаагүй, үзэгдэх орчин муу, осол аваар их гардаг есөн цэгийг засварт оруулж байна. Тэмдэг, тэмдэглэгээ, босоо, муруй шугамууд гээд замын стандартыг хангасан байхаар хийж байна. Их засварын дараа Дархан-Улаанбаатарын зам 8 мм-ийн өргөнтэй, 5 см-ийн хучилттай, цементээр хучсан хоёр үе суурьтай болох юм. Гэхдээ бид яаравчлаад өвлөөс өмнө арваннэгдүгээр сард замаа ашиглалтад өгөхөөр төлөвлөж байгаа аж.