Нийслэлийн Засаг Даргын Тамгын газар, ЖАЙКА олон улсын байгууллагатай хамтран "Улаанбаатар хотын нийтийн тээврийн автобусны дизель хөдөлгүүрт DPF тортог шүүгч суурилуулж хөдөлгүүрээс ялгарах тортогжилтыг бууруулах туршилтын төсөл" хэрэгжүүлж байна.

Нийслэлийн Засаг даргын Агаар орчны бохирдол хариуцсан орлогч дарга Ж.Батбаясгалан “Монгол Улс анх 1995 онд Агаарын бохирдлын тухай хууль батлан гаргаснаас хойш багагүй хугацаа өнгөрсөн байна. Энэ хугацаанд агаарын чанарыг сайжруулах, агаарын бохирдолтой тэмцэх, гадаад орчны бохирдлыг бууруулах чиглэлд олон үйл ажиллагаа, төсөл хөтөлбөрүүдийг хэрэгжүүлж байсан. Мөн энэ хугацаанд Япон улсын Засгийн газартай нягт хамтран ажиллаж байсан гэдгийг дурдах нь зүйтэй. Учир нь манай улсын нийгмийн салбарт маш олон зүйлийг Японы буцалтгүй тусламжаар хийж, хэрэгжүүлж байсан. Монгол Улсын Засгийн газар агаарын бохирдол бууруулах чиглэлээр 2017 онд ЖАЙКА-тай хамтарч нэг томоохон ажил эхлүүлсэн нь нийтийн тээврийн автобусанд суурилуулсан тортог шүүгч суурилуулж эхэлсэн ажил юм. Өнөөдрийн байдлаар уг төхөөрөмжийг 24 автобусанд суурилуулаад байна. Энэ шүүлтүүр нь бохирдлыг 97 хувь шүүдэг нь лабораторийн шинжилгээгээр гарсан” гэв.

Япон улсын Элчин сайдын яамны Хоёрдугаар нарийн бичгийн дарга Мацухаши Томоюуки “Миний хувьд Улаанбаатар хотод амьдраал нэг жил орчим болж байна. Энэ хотод амьдрахад тав тухтай сайхан байдаг хэдий ч агаарын бохирдол гэсэн сэтгэл зовоосон асуудал их байна. Агаарын бохирдлыг үүсгэж байгаа гол шалтгаан нь өвлийн улиралд гэр хорооллын утаа, эдийн засгийн хөгжлөөс үүдэн нэмэгдэж буй олон тооны автомашинаас ялгарах утаа тортог гэж ойлгож байгаа. Эдгээр асуудлыг шийдэхэд Монгол Улсаас олон арга хэмжээ авч ажиллаж байгаа ч энэ нь нэг өдрийн дотор шийдвэрлэгдэх асуудал биш ээ. Тийм учраас олон улсын олон байгууллага хамтран ажиллаж байна. Харин энэ төсөл нь маш өндөр үр гэж туршилтын дүнгээс гэж харж байна. Япон улс Монголыг бодоход байгалийн баялаг багатай тул аж үйлдвэржилтийн аргаар хөгжүүлсэн. Мөн тухайн үед агаарын бохирдол асудал болж байсан нь уг төхөөрөмжөөр шийдэж байсан” гэдгийг онцоллоо.

Б.Лхам