Өнгөрсөн амралтын өдрүүдэд Тээврийн цагдаагийн алба нийт 483 дуудлагыг хүлээн авснаас зам тээврийн ослын шинжтэй 310 дуудлага, мэдээллийг шалгаж шийдвэрлэжээ.
Бүртгэдсэн осол, хэргийн улмаас нийслэлд 16 хүн гэмтэж, ноцтой зам тээврийн ослын улмаас орон нутагт хоёр хүний амь нас хохирсон байна.
Тухайлбал, энэ сарын 3-ны өдөр 06.30 цагийн орчимд Сэлэнгэ аймгийн Жавхлант сум II баг “Нарстайн ам” гэх газар /сумын төвөөс зүүн тийш 10 км/ асфалтан замд Hyundai Mighty маркийн автомашин онхолдож жолооч 49 настай, эрэгтэй Л нас баржээ. Түүнчлэн энэ сарын 4-ний өдрийн 09.20 цагийн орчимд Дундговь аймгийн Луус сумын “Цомог” гэх газар асфалтан замд Mitsubishu minicab маркийн автомашин онхолдож, жолооч Б нас барсан хэрэг бүртгэгджээ.
Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 70 жолоочийг илрүүлэн хуулийн дагуу хариуцлага тооцсон байна.
Энэ оны эхний хагас жилийн байдлаар ОНХОЛДОХ ХЭЛБЭР-ээр 461 осол бүртгэгдэж 185 хүний амь нас хохиржээ. Эдгээр олсын 410 буюу 88.9 хувь, амь нас хохирсон 107 буюу 57.8 хувийг орон нутгийн замд гарсан зам тээврийн осол эзэлж байна.
Иймд жолооч та бүхэн орон нутгийн замд хөдөлгөөнд оролцохдоо согтууруулах ундааны зүйл хэрэглэсэн үедээ замын хөдөлгөөнд оролцохгүй байх, хурд тогтоосон хязгаараас хэтрүүлэхгүй байх, замын нөхцөл байдлаа судалж хөдөлгөөнд оролцох, гүйцэт түрүүлэх үйлдэл буруу хийхгүй байхыг Тээврийн цагдаагийн албанаас анхааруулж байна.
