“Муу хүн чөлөөнөөр чоно борооноор” гэгчээр усархаг бороо их хэмжээгээр орсон ойрын хоёр өдөр таксины жолоочид үйлчлүүлэгчдээсээ хүссэн үнээ нэхэж, км тутамд 2000 төгрөгөөр үйлчилгээ үзүүлэх нь энгийн үзэгдэл болж хувирлаа.  2500 гардаг газар 5000 төгрөг хээв нэг нэхэж  байна.

Ер нь бороо орж, хэт хүйтрэх үед амандаа орсон тоогоо хэлж, үнээ нэмдэг бичигдээгүй хууль такси тээвэр эрхэлдэг хэсэг бүлэг хүмүүсийн дунд хэрэгжээд хэдэн жилийг ардаа үджээ.  Эл асуудалд ШӨХТГ болон Нийслэлийн тээврийн газар хяналт тавих үүрэгтэй. Хариуцаж ажиллах ёстой тус газрууд хувиараа такси эрхэлдэг хувь хүмүүст хяналт тавих нь битгий хэл үнийн өсөлтийн талаар ямар ч мэдээлэлгүй байх. Хуулийн хүрээнд ямар нэгэн арга хэмжээ авахгүй байгаа нь тэднийг ийн дураараа дургих шалтгаан болсоор байна. “Өдөр, шөнөгүй ядартлаа таксинд явж байна” гэж уцаарлангүй үйлчлэх тэднийг иргэд бид өөрсдөө даврааж, хүссэн мөнгийг нь өгч байгаа юу гэвэл үгүй. “Шавар шалбааг ихтэй байна. Хар усан борооноор хүссэн газар чинь авч ирлээ. Энэ зэргийн нэмэгдэл байхгүй яадаг юм” гэх сүржин үгээр өөрсдийгөө өмгөөлж, хэлсэн мөнгөө авахын тулд хүний биед халдаж, зүй бус үгээр доромжлох нь хувиараа такси эрхлэгч нар хэлж байна. Тэдэнд шаардлага тавих эрх үйлчлүүлэгчдэд бараг байхгүй. “Тэр замаар тэгж явна” гэхэд өөрсдөө дур мэдэн холуур тойрох, замдаа туулайчлах буюу зүг нэг өөр хүмүүсийг суулгаж, нэг сумаар хоёр туулай буудах нь эдний хувьд байх ёстой зүйл мэт.

Олуулаа нэг таксинд суух байсан бол тухайн үйлчлүүлэгч автобусанд суух боломжтой. Хүссэн газраа тав тухтай хурдан очихын тулд такси үйлчилгээг сонгодог. Гэтэл үйлчлүүлэгчийг тийм тааламжтай орчин угтдаггүй.

Суудлын бүрээс нь хир тартаг, ундааны сав, тамхины иш хөглөрч харагддаг. Үүнийг үйлчлүүлэгчид ийм болгосон гэх тайлбарыг хээв нэг хэлээд суух. Цэвэр цэмцгэр тохь тухтай орчинд үйлчилгээ үзүүлэх сэтгэл сэтгэхүй тэдэнд лав байхгүй. Харин ч хэдэн төгрөг илүү авах тэдний бодол толгойд нь эргэлддэх болсоор уджээ. Адилхан ажиллаж, амьдарч яваа хүмүүс тэдэнд илүү мөнгө  төлж, өөрсдийн хэрэглээнээсээ хасахыг хүсэхгүй. Тиймдээ ч тэдний хүссэн мөнгийг өгөхгүй гэж хэлснийхээ төлөө жирэмсэн эмэгтэйг машинаар дайрахыг завдсан. Ажлаа орой тараад харьж явсан эмэгтэйг цохиж, зодсон тохиодлын талаар хохирогч өөрийн цахим хуудаст зурагтай пост оруулж байсан. Энэ бол хоёрхон жишээ.

Нэгхэн өдөрт энэ төрлийн олон арван эмгэнэлтэй жишээ гарч байгааг энд дурдах нь зүйн хэрэг.  Оройн цагаар бүр тарифынхаа үнийг дахин нэг нугалж, согтуу хөлчүү хүмүүсээс хэд дахин илүү мөнгө “ангуучилдаг” тэдний  эл үйлдэл хэрээс хэтэрч байгааг шүүмжлэх хүн олон бий.  Тэгэхээр холбогдох байгууллагууд иргэдийнхээ эрх ашгийг хамгаалж, дуртай үнээрээ иргэдэд үйлчилдэг даварсан таксины жолооч нарт хяналт тавьж, хариуцлага тооцох шаардлагтай байна.

 С.Ичинхорлоо