Нийслэлийн Засаг дарга бөгөөд Улаанбаатар хотын захирагч С.Амарсайхан Хан-Уул дүүргийн Нэгдсэн эмнэлгийн ойролцоо үүсээд буй нөхцөл байдалтай газар дээр нь танилцаж, шаардлагатай арга хэмжээг авлаа. Тус эмнэлгийн ойролцоо орон сууцны барилга барихаар газрын зөвшөөрөл авсан барилгын компани үерийн далан хааж барилга барьсан байна. Үүний улмаас уулнаас буусан үер Яармагийн автозам руу шууд урсан орж, үерт автуулжээ. Одоогийн байдлаар орон сууцны гурван барилгыг үерийн далан хааж, зөвшөөрөлгүй барьсан байна. Барилга барьж буй компанийн төлөөлөл "2017 онд ТЭЗҮ-гээ баталсан. 2018 оноос баригдаж эхэлсэн. Үерийн даланг өөр газар шилжүүлэн барьсан. Нийт 270 айлын орон сууц барьж байгаа" гэдгээ хэлсэн юм. Харин мэргэжлийн хяналтын газраас "зөвшөөрөлгүй барьсан, хүчрэхгүй байна" гэдгийг хэлсэн юм. 

Холбогдох албаны хүмүүсийн хэлснээр хуучин байсан үерийн усны хоолойг бөглөж, барилга барьсан байна. Үүнээс нь болж уулнаас буусан үерийн ус хальж, автозам руу оржээ. 

Барилга барьж байгаа компанийн зүгээс далан барихаар зураг төслөө холбогдох байгууллагад өгсөн. Гэтэл шийд өгөөгүй. Бидэнд "Далан барь" гэж огт хэлээгүй гэдэг зүйлийг хэлсэн юм. Харин мэргэжлийн хяналтын газраас "Танай байгууллагад зөвшөөрөлгүй барилга бариулахгүй, далан хаалаа" гэсэн албан бичгийг удаа дараа өгсөн. Танайд далан барих зураг төсөл байхгүй. Бидэнд өгөөгүй" гэдгийг хэлсэн юм.

Үүнийх нь хариуд хотын дарга С.Амарсайхан "Та нар зөвшөөрөлгүй барилга барьчихаад өөрсдийгөө өмөөрөх хэрэгггүй. Та нарын буруутай үйлдлээс болж улсын төсвөөр хийсэн бүх бүтээн байгуулалт устлаа.

Танай барилгыг зогсооно. Улсад учруулсан хохирлыг танай байгууллага хариуцна.

Барилгаа сэтэлнэ үү, яана хамаагүй. Үерийн далан гарга. Одоо далан барьчихая гэж том дуугарах хэрэггүй. Хэн болчихоод том дуугарч, хэнийг тохуураад байгаа юм бэ. Та нарын буруугаас болж Яармагийн хоёр км автозам үерт автлаа. Автозам эвдэрлээ. Энэ бүх хохиролыг танайх хариуцана. Бүх холбогдох байгууллагад үүссэн хохирлыг барагдуул. Танайд тооцоог нь хүргэнэ" гэлээ. Үүний дараа барилга барьж буй компанийн удирдлагууд "Бид далан барихгүй гээгүй. Хугацаа өгчих. Одоо ч хамаагүй далан барьчихъя. Хийхгүй гээгүй. Далан барьж чадна" гэв. 

Хотын даргаас барилгын удирдлага болон мэргэжлийн хяналтын байгууллагын алба хаагчдад хандаж, "Барилгын үйл ажиллагааг зогсоо. Барилгын хашаа руу нэг ч хүн оруулж болохгүй. Нэг ч тоосго хөдөлгөж болохгүй. Өнөөдөртөө багтааж, улсад хэдэн төгрөгийн хохирол учруулсан тооцоог гаргаж өг" гэхэд компанийн захирал "Бид хавраас хойш энэ асуудлыг шийдэх гэж оролдсон. Одоо энэ асуудлыг ярьмааргүй байна. Маргааш бүх материалаа аваад очъё. Тэгээд ярилцая. Би хэлсэн. Автозам дагуу тарьсан мод чинь ургахгүй. Манай дулааны шугам дээр мод тарьчихлаа. Би барилгаа барьж дуусаад мод тарьж өгье" гэж олон удаа хэлсэн, гуйсан" гэдгийг хэллээ. 

Албаны хүмүүс "Ажлын зураг одоо ч батлагдаагүй" гэхэд "Та нар битгий худлаа хэл. Автозамын газраас бидний ажлыг хойшлуулсан. Бичиг хүртэл өгсөн. Зам тавина гээд барилгын ажлыг хойшлуулсан. Үнэн биз дээ. Би маргааш баримтаа аваад очьё. Битгий дайраад бай. Баримттай ярих хэрэгтэй шүү. Би бүх газарт нь очсон. Бүх зөвшөөрөл хүссэн. Гүүр барих хүсэлтээ өгсөн. "Болохгүй ээ, чи яагаад зам тавих ёстой юм бэ" гэж компанийн захирал хэлэхэд "Баримттай ярих хэрэгтэй. Энэ асуудлыг шалгана. Энд хэрүүл хийх гэж ирээгүй. Хийсэн ажлаа хар. Бүх хохиролыг танайх хариуцна шүү. Өчнөөн давхар барилга барьчихаад олон нийтийн өмч, эрхийг уландаа гишгэлж байдаг. Ингэж болохгүй. Ажил явахгүй байна гэлээ. Гэтэл 10 гаруй давхар барилга барьсан байгаа чинь үнэн биз дээ. Асуудал тодорхой болтол барилгын ажлыг зогсоолоо. Хэрвээ үйл ажиллагаа явуулбал мэргэжлийн хяналтынхан толгойгоороо хариуцна. Автозамынхан хясан боож, үйл ажиллагааг нь журмын дагуу явуулаагүй бол Автозамынхан хариуцлагаа хүлээнэ шүү" гэж хотын дарга С.Амарсайхан хэллээ.

Г.Эрдэнэ