АТҮТ /Авто тээврийн тээврийн үндэсний төв/-ийн мэргэжилтэн Б.Батцэцэгээс улсын дугаарын олголттой холбоотой дараах зүйлийг тодрууллаа. Онцлоход тус газраас ногоон дугаарыг олгож эхлээд байгаа юм.
-Ногоон дугаар авахаар хэчнээн иргэн хүсэлт өгөөд байна вэ. Одоогоор хэчнээн хүсэлтийг хүлээж авсан юм бол?
-АТҮТ-өөс одоогоор иргэдэд ногоон дэвсгэртэй 54 дугаар олгосон байна. Уг дугаарыг цахилгаан машинтай иргэд хүсэлт гаргасан тохиолдолд олгодог юм. Өөрөөр хэлбэл, иргэд ногоон дэвсгэртэй дугаар авахыг хүсвэл АТҮТ-д хүсэлт гаргах ёстой.
Автотээврийн үндэсний төвөөс хэрэглэгчийн эрэлт хэрэгцээнд нийцсэн тээврийн цогц үйлчилгээг иргэдэд үзүүлэх чиглэлээр хэд хэдэн ажлуудыг хэрэгжүүлж эхэлсэн. Үүний нэг нь тээврийн хэрэгслийн бүртгэл, дугаар олгохтой холбоотой үйл ажиллагааг хөнгөвчилж, иргэдэд нээлттэй, ил тод болгох ажил юм. Тус үйлдвэрийн газраас тээврийн хэрэгслийн бүртгэлийн үйл ажиллагааг Улаанбаатар хотын найман цэг, 21 аймгийн 23 салбараар дамжуулан иргэд, аж ахуйн нэгж байгууллагад хүргэдэг. Энэхүү цахим системийг нэвтрүүлснээр “дугаарын наймаа” гэгдэх хууль бус явдлыг таслан зогсоох ач холбогдолтой юм.
-Энэ онд импортоор оруулж ирсэн автомашины хэд нь цахилгаан тэрэг байдаг вэ?
- Энэ оны хагас жилийн байдлаар улсын хэмжээнд нийт 1.003.922 тээврийн хэрэгсэл бүртгэлтэй байгаагаас 2019 онд шинээр бүртгэгдсэн 57.568 тээврийн хэрэгсэл байна. Энэ нь өмнөх оны мөн үеийнхээс 20 гаруй хувиар өссөн үзүүлэлттэй байгаа юм.
Мөн улсын хэмжээнд цахилгаан машин 213 байдагаас 201 нь нийслэл хотод, 12 нь орон нутагт байна. Харин мпортоор энэ оны хагас жилийн байдлаар 52.000 тээврийн хэрэгсэл бүртгэгдсэн байна.
-УАА-тай дугаарыг хэдэн иргэн авсан байдаг юм бол. Шалгуур нь ямар байдаг юм бэ?
-2012 оноос хойш тээврийн хэрэгслийн улсын дугаарын сери шинээр олгогдоогүй бөгөөд Улаанбаатар хотын хэмжээнд нийт 50 серийн 499.950 дугаар байдгаас өнөөдрийн байдлаар тээврийн хэрэгсэлд олгох дугаарын хомсдол үүссэн юм. Иймд нийслэл хотод олгогдох дугаарын нөөц дууссантай холбоотой шинээр улсын дугаарын сери болох “УАА” серийг олгож эхэлсэн. Уг серийг зөвхөн импортоор орж ирсэн, шинээр бүртгүүлж буй тээврийн хэрэгслүүдэд олгоно.
Одоогийн байдлаар УАА 3300 орчим дугаар иргэдэд олгоод байна. Ингэхдээ тээврийн хэрэгслийн эзэмшигчийн харьяаллаар улсын дугаар олгодог юм. Мөн нийслэлээс орон нутаг руу, орон нутгаас нийслэл рүү тээврийн хэрэгслээ шилжүүлж байгаа тохиолдолд шинэ сериэр шилжилт хийгдэнэ.
-Шинэ серийн дугаар өндөр үнээр дамлагдаж байна гэсэн гомдол холбогдох байгууллагад бүртгэгдсэн байна. Улсын дугаар дамын наймаачдад очихгүй байх талаар танай байгууллага хэрхэн ажилладаг юм бол?
-АТҮТ-өөс дугаарыг дамнаж зарсан асуудал байхгүй. Зарим иргэд энэ талаар буруу ойлголттой байна. Бид уг асуудлаар Эрүүгийн цагдаагийн газар болон хууль, хяналтын байгууллагад хандсан. Тиймээс олон нийтийн сүлжээнд тавигдсан зар, мэдээлэлд хууртаж залиланд өртөхгүй байхыг иргэдэд сэрэмжлүүлээр байна. Түүнчлэн автомашины бүх улсын дугаарыг иргэдэд олгоход 7600 төгрөгийн хураамж л авдаг юм. Өөрөөр хэлбэл, өндөр үнээр худалдана гэдэг хууль буй үйлдэл юм.
АТҮТ-өөс Эрүүгийн цагдаагийн албаны Кибер гэмт хэрэгтэй тэмцэх хэлтэстэй хамтран олон нийтийн сүлжээнд “улсын дугаар авна, зарна” гэсэн долоон бүлгэмийг хааж улсын дугаар наймаалцахтай холбоотой үйл ажиллагааг таслан зогсоосон. Цаашид тээврийн хэрэгслийн бүртгэлийн үйл ажиллагаанд иргэний хурууны хээг уншуулан бүртгэл хийхээр ажиллаж байна.
Б.Лхам
