ҮСХ-оос өнгөрсөн сарын нийгэм, эдийн засгийн статистикийн мэдээллийг танилцууллаа.
Хөдөлмөр эрхлэлтийн байгууллагад ажил хайж бүртгүүлсэн иргэд энэ оны долдугаар сарын эцэст 32.9 мянга, үүнээс 22.4 мянга нь бүртгэлтэй ажилгүй иргэд байна. Харин 10.5 мянга нь ажилтай боловч өөр ажил хайж байгаа иргэд байгаа аж.
Нийт бүртгэлтэй ажилгүй иргэд өмнөх оны мөн үеэс 106 хүнээр, өмнөх сараас 631 хүнээр буурчээ. Бүртгэлтэй ажилгүй иргэдийн 12 мянга нь эмэгтэйчүүд байна.
Хөдөлмөр эрхлэлтийн байгууллагад өнгөрсөн сард 6272 хүн шинээр бүртгүүлсэн бөгөөд эдгээр иргэдийг ажил хайж буй шалтгаанаар нь авч үзэхэд 57 хувь нь ажлаас чөлөөлөгдсөн болон халагдсан иргэд байна. Тэгвэл бүртгэлтэй ажилгүй иргэдийн 49.3 хувийг бүрэн дунд, 27.9 хувийг дипломын болон бакалаврын дээд, 7.2 хувийг техникийн болон мэргэжлийн, 6.3 хувийг суурь, 4.5 хувийг тусгай мэргэжлийн дунд, 2.6 хувийг бага, 1.3 хувийг боловсролгүй, 0.9 хувийг магистр, доктор зэрэгтэй иргэд эзэлж байна гэсэн судалгаа гарчээ.
Өрхийн нийгэм, эдийн засгийн энэ оны хоёрдугаар улирлын судалгаагаар нэг өрхийн сарын дундаж мөнгөн орлого 1.2 сая төгрөг болж, өмнөх оны мөн үеэс 194.4 мянган төгрөгөөр өсчээ.
Үүнд цалин хөлсний орлого 121.2 мянган төгрөг, хөдөө аж ахуйн үйлдвэрлэлийн орлого 36.9 мянган төгрөгөөр өссөн нь голлон нөлөөлжээ.
Өрхүүдийг мөнгөн орлогоор нь бүлэглэн авч үзвэл энэ оны хоёрдугаар улиралд өмнөх оны мөн үеэс 300.000 төгрөгөөс доош орлоготой өрх 38.5 мянгаар, 300.001-500.000 төгрөгийн орлоготой өрх 20.9 мянгаар буурсан бол 1.600.001-2.100000 төгрөгийн орлоготой өрх 24.6 мянгаар, 2.100.001 төгрөгөөс дээш орлоготой өрх 39.9 мянгаар нэмэгдсэн байна.
Улсын хэмжээнд өнгөрсөн сард 45.0 мянган эх амаржиж, 45.3 мянган хүүхэд төрүүлсэн нь өмнөх оны мөн үеэс амаржсан эх 306-аар, амьд төрсөн хүүхэд 359-өөр нэмэгдсэн байна. Харин нялхсын эндэгдэл 599 болж, өмнөх оны мөн үеэс 10-аар, тав хүртэлх насны хүүхдийн эндэгдэл 720 болж, өмнөх оны мөн үеэс 37-оор буурсан байна.
Б.Лхам
Сэтгэгдэл (2)