Засаг даргын захирамжаар 102 байршлын 179 обьектыг чөлөөлж, улмаар албадан буулгахад гаргасан зардлыг иргэн, аж ахуйн нэгжээс гаргуулах талаар Нийслэлийн газрын алба болон бусад холбогдох албанаас мэдээлэл хийлээ. Энэ талаар нийслэлийн Газрын албаны орлогч дарга Д.Нямдаваа “Баянгол дүүрэгт 22 байршил 21 обьект, Баянзүох дүүрэгт 18 байршилд 16 обьект, Сонгинохайрхан дүүрэгт 21 байршилд 13 обьект, Сүхбаатар дүүрэгт 16 байршилд 16 обьект, Хан-Уул дүүрэгт гурван байршилд гурван обьект, Чингэлтэй дүүрэгт 21 байршилд 14 обьектийг чөлөөлсөн. Тухайлбал, Чингэлтэй дүүргийн нутаг дэвсгэр дэх “Мандухай” зочид буудлын хашааг буулгасан. Сүхбаатар дүүргийн V, VI хороо, 77 дугаар сургуулийн баруун хойд талын газар, “Шинэ Монгол” сургуулийн урд талд автозамд тулган барьсан хашааг чөлөөлсөн.

Эхний шатны төлөвлөгөөний гүйцэтгэл дууссантай холбоотой уг ажлыг эрчимжүүлэх зорилгоор нийслэлийн Засга даргын захирамж гарсан. Энэ хүрээнд нийслэлийн зургаан дүүргийн хэмжээд судалгаа хийхэд 198 обьектын зөрчил илэрч, үүнээс 52 обьектыг чөлөөлөөд байна. Газрын тухай 57 дугаар зүйлд заасаар албадан буулгасан. Эдгээрээс гурван аж ах ахуй нэгжид газар чөлөөллөх, зөрчил арилгах мэдэгдлийн дагуу арга хэмжээ авсан. Газар чөлөөллөснөөр хорооллын дундах 26 байршилд орц, гарц нээгдэнэ. Нийтийн эзэмшлийн 12 байршилд явган хүний зам талбай хийгдэх боломж нээгдсэн. Явган хүний зам хаасан 45 байршилд газар чөлөөлөлт хийгдснээр тохижилт хийх боломж нээгдсэн” гэлээ. Үүний дараа сэтгүүлчдийн сонирхсон асуултад хариулт өглөө.

-Зөвшөөрөл авахгүйгээр обьект барьдаг асуудалд хэрхэн хяналт тавьж ажилладаг юм бэ. Мөн албадан буулгалт хийсэн зардлыг хаанаас гаргах вэ?

-Газрын тухай хуульд заасан байдаг. Эхний 102 байршилд газар чөлөөлөлт хийхэд 23 сая төгрөг зарцуулсан. Энэ мөнгийг улсын төсвөөс гаргасан. Гэхдээ хууль бусаар хашаа, хайс хатгасан этгээдээс гаргуулах хуулийн үндэслэл бий.

-Хохирол барагдуулсан тохиолдол бий юү?

-Шүүхэд нэхэмжлэл гаргасны дагуу хохирол барагдуулдаг. Чөлөөлөлт хийгдэж дууссаны дараа зардлын тооцоо гарна. Үүний дараа шүүхэд хандана. Аж ахуйн нэгжид зөрчил арилгуулах тухай мэдэгдэл хүргүүлдэг. Гэвч зургаа батлуулж, гүйцэтгэлийн ажил эхлэх болохоороо тодорхой хэмжээний зөрчил гаргах тохиолдол байдаг. Улаанбаатар хотод Монгол Улсын нийт хүн амын 60 хувь нь амьдардаг. Эдгээрээс 220 мянган гаруй иргэн, аж ахуйн нэгж газар эмшиж, ашигладаг. Гэтэл дүүрэг, нийслэлийн хэмжээнд байгаа газар зохион байгуулагчид энэ бүхэнд хүрч ажиллах боломж хомс байдаг. Ялангуяа баяр наадмын үеэр хууль зөрчиж, барилга байгууламж барих явдал их гардаг. Тиймээс иргэдээс ирүүлсэн мэдээллийн дагуу хяналт, шалгалт хийдэг.

-Газар чөлөөлсөн байршлуудад ямар хэлбэрээр тохижилтын ажил хийх бэ. Иргэдээс санал авах уу?

-Иргэдээс санал авдаг. Иргэдээс “Энэ газрыг чөлөөлж өгөөд явган хүн явах боломжоор хангаж өгөөч ээ” гэдэг хүсэлт ирдэг. Түүнээс биш “Ийм хэмжээтэй зам тавьж өгөөч” гэдэг хүсэлт ирдэггүй. Бид хуулийн хүрээнд журмаа баримтлаж газар чөлөөлдөг. 52 дугаар сургуулийн ард өргөтгөл барьсан асуудал гарсан. Өргөтгөл барьсан иргэн шаардлагын дагуу өртгөлийн барилгаа буулгасан.

Г.Эрдэнэ