Энэ сарын 27-ны өдөр Мал аж ахуйн эрдэм шинжилгээний хүрээлэнгийн захирал асан Т.Батсүхийг Архангай аймгийн Засаг дарга Т.Мөнхнасан "Ажлаа өг" хэмээн дарамталж, гэрт нь зодсон гэх хэрэг гарсан талаар бид мэдээллэсэн. Энэ талаар Т.Мөнхнасанаас утсаар тодруулахад "Би бусдыг зодоогүй. Харин ч өөрөө зодуулсан. Намайг гэрт нь очихгүй, орохгүй гээд байхад дуудсаар байгаад гэртээ ирүүлсэн.

Гэрт нь ороход Т.Батсүх өөрөө архи уучихсан байсан. Өмнө нь ажлаас нь халах гээд байна. БСШУС-ын сайд Ё.Баатарбилэгт хэлээд өг гэх маягийн юм надад хэлж байсан юм. Би ном дүрмээрээ л бай гэж хэлсэн. Үүнд өс санадаг байсан юм болов уу даа.

Гэтэл тэр өдөр уулзая гэж олон удаа дуудсан. Нэг ангийн хүүхдүүд юм хойно элдэв юм санаагүй очсон. Гэтэл миний толгой руу шовх үзүүртэй зүйлээр цохиж, гэмтээсэн. Намайг бүр зодсон. Би эмнэлэгт үзүүлэхэд гэмтэл авсан гэж гарсан. Тархи хавагнасан байна лээ. Би шүүхэд хандсан. Би Т.Батсүхийг зодоогүй. Харин намайг зодсон. Удахгүй хот орж байж, хуулийн дагуу ярина" гэлээ. 

Г.Эрдэнэ