Өнөө жилийн Улсын баяр наадамд шөвгөрсөн бөхчүүдээс допингийн шинжилгээ авахад хоёроос нь хориотой эмийн бодис илэрч, отгон аварга Э.Оюунболдыг допинг хэрэглэсэн хэмээн Үндэсний их баяр наадмын салбар хорооныхон зарлаад удаж байна.

Энэ хугацаанд залуу аварга зүгээр суусангүй. Өөрийн цахим хаягаар “Би допинг хэрэглээгүй, хэлмэгдсэн” хэмээн мэдэгдэл хийж, Салбар хороог шүүхэд өгсөн. Түүнд унасан бөхчүүд ч амаа үдүүлэлгүй, эхнээсээ дуугарч эхэллээ. Э.Оюунболдод наймын даваанд өвдөг шороодсон улсын арслан Ц.Содномдорж өөрийн цахим хаягтаа ийн бичжээ. “Монгол наадам, монгол өв соёл, их эзэн хаанаас минь өвлөж ирсэн эрийн гурван наадам иртэй хүчитнээ шалгаруулж, эрхий мэргэн харваачаа сорьж, эрэмгий хурдан хүлгээ уралдуулж ирсэн түүхтэй ард түмэн билээ.

Ард түмнээ хүндлэн, төрийн түшээд маань үнэн шударгаар шийдвэрлэж өгнө үү. No doping” хэмээн байр сууриа илэрхийлсэн байна. Нэмж хэлэхэд, Ц.Содномдорж допингийн шинжилгээний хариугаа сошиалаар хамгийн түрүүнд зарлаж, бусад бөхчүүд ч энэ давлагаанд нэгдэж байлаа.

Б.Жаргал