Энэ долоо хоногт болсон үйл явдлыг онцлон хүргэж байна.

Шалгалтын явцад алба хаагчдаас 600 гаруй сая төгрөг илэрсэн байж болзошгүй байна

Төрийн байгууллагаар үйлчлүүлэхэд хүнд суртал, чирэгдэл ихтэй гэх иргэдийн шүүмжлэл их байдаг. Тэгвэл манай улсын улс төрийн өндөр албан тушаалтан хийгээд төрийн байгууллагын шат бүрт авлига  гүн нэвчсэнийг АТҮТ-д гарсан асуудал харуулж байна. Тодруулбал, АТҮТ-ийн нэр бүхий албан тушаалтнууд авлига авч, бусдад давуу байдал олгосон асуудлаар шалгагдаж байгаа юм.  Эх сурвалжийн мэдээлж байгаагаар “Есөн шижир” хэмээх ББСБ-ын нэр дээр бүртгэлтэй 31 тээврийн хэрэгслийг есөн сая гаруй төгрөгийн торгуулиас нь бултуулахын тулд 2.1 сая төгрөгийн хахууль авч улсын бүртгэлээс хасаж, өөр дугаар олгосон үйлдэл тогтоогдоод байгаа гэдгийг хэлсэн юм.

Монголбанкны ерөнхийлөгч, Санхүүгийн зохицуулах хорооны даргыг тус тус томиллоо

Манай улс “Саарал жагсаалт”-д ороод сар гаруй хугацаа өнгөрчээ. Эрх баригчдын зүгээс “Саарал жагсаалт”-д ороход хүргэсэн албан тушаалтнуудад хариуцлага тооцох ёстой талаар тухайн үед ярьсан бий. Гэвч жинхэнэ хариуцлага хүлээх ёстой албан тушаалтнууд нь уснаас хуурай гарч, оронд нь Монголбанкны ерөнхийлөгч, Санхүүгийн зохицуулах хорооны дарга нарыг албан үүргээс нь чөлөөлснөөр асуудлыг намжаах аж.

УИХ-ын чуулганы хуралдаанаар Монголбанкны ерөнхийлөгчөөр тус банкны Дэд ерөнхийлөгч Б.Лхагвасүрэн, СЗХ-ны даргаар дэд дарга Д.Баярсайхан нарыг томилсон юм.

Хамгийн гол нь долларын ханш чангарч эхэллээ. Энэ талаар ярьж буй нэг ч төрийн өндөр албан тушаалтан алга байна. Тухайлбал, Монголбанкны ханшаар аравдугаар сарын 23-нд 2683.69 төгрөг байсан бол өнөөдөр 2706.68 төгрөгтэй тэнцэж байна. Цаашид нэмэгдсээр л байх болов уу!?

Үндсэн хуулийн цэцийн даргыг хүсэлтийнх нь дагуу чөлөөлөв

БНСУ-ын онгоцны үйчлэгчид бэлгийн дарамт үзүүлсэн асуудлаар саатуулагдаад байсан Цэцийн дарга Д.Одбаяр даргын албан үүргээсээ чөлөөлөгдлөө. Тодруулбал, тэрбээр “Монгол Улсынхаа нийт иргэдээс уучлал хүсч байна” гэсээр энэ сарын 15-нд албан ёсоор чөлөөлөгдөх хүсэлтээ өгсөн юм. Түүний хүсэлтийн дагуу өнгөрсөн баасан гарагт цэцийн гишүүд хуралдаж даргын албан тушаалаас нь чөлөөлж, цэцийн гишүүн хэвээр үлдээсэн юм.

Монгол Улсын хөдөлмөрийн баатар нэгээр нэмэгдлээ

Тулгар төрийн 2228 жил, Их Монгол Улс байгуулагдсаны 813 жил, Үндэсний эрх чөлөө, тусгаар тогтнолоо сэргээн мандуулсны 108 жил, Ардын хувьсгалын 98 жил, Ардчилсан хувьсгалын 30 жилийн ой, Атар газар эзэмшсэний 60 жилийн ойг тохиолдуулан Монгол Улсын Ерөнхийлөгч Х.Баттулга зарлигаар Монгол Улсын хөдөлмөрийн баатар нэгээр нэмэгдэв.

Монгол Улсад газар тариаланг хөгжүүлэх, хүн ардыг эрүүл, цэвэр хүнсээр хангах үйлсэд онцгой гавьяа байгуулж, залуу хойч үедээ хөдөлмөрч хичээнгүй чанарын үлгэр дуурайлал үзүүлж буй Сэлэнгэ аймгийн Ерөө сумын “Их Шинэстэй” ХХК-ийн захирал, Монгол Улсын гавьяат механикжуулагч Сандагийн Ганболдод Монгол Улсын хөдөлмөрийн баатар цол хүртээж, Хөдөлмөрийн баатрын алтан соёмбо, Сүхбаатарын одонгоор  шагналаа.

Цэцийн шийдвэрийг УИХ залрууллаа

Үндсэн хуулийн Цэцээс Ашигт малтмалын тухай хуулийн зарим зүйл заалтыг хүчингүй болгох шийдвэр гаргасантай холбоотойгоор 2020 оны улсын төсвийн орлогоос 1.3 их наяд төгрөг дутах нөхцөл үүсээд байсан. Гэсэн ч Сангийн яам шуурхай ажиллаж хуулийн төслийг боловсруулснаар энэ алдааг залруулж чадлаа.

Тодруулбал, өнөөдөр УИХ-ын чуулганы нэгдсэн хуралдаанаар Ашигт малтмалын тухай хуульд нэмэлт, өөрчлөлт орууллаа. Ингэснээр Үндсэн хуулийн Цэцийн улсын төсөвт хохиролтой шийдвэрийг УИХ залруулж чадлаа.

Б.Лхам