Байгалийн түүхийн музейн барилгыг хүчитгэн засахад шаардагдах хөрөнгийг улсын төсвөөс гадуур шийдвэрлэх боломжийг бий болгосон. Гэтэл үр дүнд хүрсэнгүй. Бид дийлдлээ. Музейн барилгыг буулгаад дуусч байна. Урд хэсгийг нь нураагаагүй хэрнээ араас нь нураагаад эхэлж. Нэг л өдөр нүүрэн тал нь буух байх хэмээн “Монгол туургатан төв холбоо”-ноос “Улсын төв музейд хууль бусаар халдаж байна” сэдвээр өнөөдөр мэдээлэл хийлээ.
Энэ талаар Улаанбаатар хотын музейн эрдэм шинжилгээний ажилтан Г.Очбаяр “Энэ музейн барилга нь Монголын орчин цагийн хот байгуулалтын түүхийн гэрч болсон архитектурын дурсгал. 2015 онд соёлын өвд бүртгэж авсан. Маш гоё хийцтэй, урдаа баганатай. Үүгээр бол Бага тойруу дахь Улаанбаатар хотын архитектурын чуулга болдгоор онцлогтой. Хот байгуулалт хотын төв, архитектур ой санамж гэсэн дөрвөн чиглэлээр соёлын өв гэдэг нь батлагдсан” гэлээ. Харин тус төвийн тэргүүн Э.Одбаяр “Улсын баяр наадмын өмнө хуучин барилгыг нурааж оронд нь Чингис хаан музей байгуулна гэсэн шийдвэр гарсан. Байгалийн түүхийн музей Улаанбаатар хотын хамгийн анхны барилгуудын нэг. БСШУСЯ-нд манай холбооноос шаардлага хүргүүлж, Захиргааны хэргийн анхан шатны шүүхэд нэхэмжлэл гаргасан.
Байгалийн түүхийн музейн барилгыг буулгасан нь цаана газрын наймаа явж байгаа. Мэргэжлийн хяналтын байгууллагын хоёр, гурван удаагийн дүгнэлт бий. 2013, 2015, 2018 онд гарсан зөвлөмжид “Музейн удирдлагуудаа холбогдох яаманд хүн ажиллах үйл ажиллагаа явуулах орчин нөхцөлийг яаралтай бүрдүүл” гэж зөвлөсөн байна лээ. Гэтэл урсгал засвар хийдэггүй, музейн үзмэрийг зарж борлуулсаар байгаад эцэстээ газарт шунаж байна.
Тендерт “Аяа” ХХК ялж өчигдрөөс дээврийг хуулж эхэлсэн байна лээ. БСШУСЯ-ны сайд Ё.Баатарбилэг газар асуудалтай байгаа гэдгийг хэлсэн. Мөн Ерөнхий сайд газарт асуудал үүссэнийг хүлээн зөвшөөрсөн. Газрын наймааны хардлагатай холбоотой баримтуудыг бид дэлгэнэ.
Захиргааны хэргийн анхан шатны шүүхээс энэ барилгыг буулгах шийдвэрийг түдгэлзүүлсэн. Гэтэл Засгийн газар иргэдийнхээ эсрэг давж заалдсанаар өнгөрөгч долоо хоногт болсон давж заалдах шатны шүүх хурал дээр түдгэлзүүлсэн шийдвэрийг хүчингүй болгож шийдвэрлэсэн. Хүчингүй болгосны дараа “Аяа” компани буулгалтын ажил руугаа орсон. Дотор нь нууцаар буулгаж ажил үргэлжилсээр байна. Музей доторх үзмэр нэлээд гэмтсэн” гэлээ.
