Төрийн албаны зөвлөлөөс шалгалтын дүнгийн талаар мэдээлэл хийлээ.

Төрийн албаны шалгалт энэ сарын 16-21-ны хооронд орон даяар явагдсан. Энэ хугацаанд 342 төрийн алба хаагч зохицуулалт хийж ажиллажээ. Улсын хэмжээнд 8894 хүн төрийн албанй шалгалтад бүртгүүлснээс 7616 иргэн шалгалтад оржээ.

Үүнээс нийт 1116 иргэн тэнцсэн буюу төрийн албаны нөөцсд бүртгэгдсэн байна. Тухайлбал, Дархан-Уул аймагт 196 хүн шалгалт өгснөөс 26, Дорноговь аймагт 169 хүн шалгалт өгснөөс 14, Завхан аймагт 302 хүн шалгалт өгснөөс 30, Өмнөговь аймагт 237 хүн шалгалт өгснөөс 26, Сүхбаатар аймагт 150 хүн шалгалт өгснөөс 21 хүн, Увс аймагт 255 хүн шалгалт өгснөөс 17 хүн тус тус тэнцжээ.

Төрийн албаны зөвлөлийн ахлах референт Б.Пүрэвдагва "Хиймэл оюун ухаан ашиглаж анх удаа явуулснаараа онцлог. Өмнө нь хуулийн мэдлэгтэй хүн ганц ном уншаад л шалгалтад тэнцчихдэг байсан бол ерөнхий мэдлэгийн хүрээнд шалгалт авдаг болсон. Иргэдийн зүгээс түүхийн асуулт ямар хэрэгтэй юм гэх шүүмжлэл их хэлж байна. Түүхээ мэддэггүй хүн төрийн албанд ажиллах боломжгүй. Мөн иргэдээс шалгалтын материалтай танилцах хүсэлт их ирсэн. Уг хүсэлтийн дагуу иргэдийг шалгалтын материалтай нь танилцуулж, дахин нягтлахад ямар нэгэн асуудал гараагүй" гэв.

Б.Лхам