Монгол Улсын Ерөнхийлөгч Х.Баттулга өнөөдөр Монгол Улсын Их Хурлын дарга Г.Занданшатарт албан бичиг илгээж, Монгол Улсын 2020 оны төсвийн тухай хууль болон түүнийг дагалдан батлагдсан зарим хуульд хориг тавьж буйг мэдэгдсэн. Энэ талаар УИХ-ын гишүүн Б.Баттөмөр “2020 оны төсвөөр 2.1 их наяд төгрөгийн орлого, 2.5 их наяд төгрөгийн зарлага гарна. 400 тэрбум төгрөгийн татаас шилжүүлгэ төсвөөс авч байна. Мөн Монгол Улсын төсөвт хамгийн их хүндрэл учруулж байгаа зүйлийн нэг нь халамжийн үйлчилгээ. Нийт 17 халамжид 756 тэрбум төгрөгийг улсын төсвөөс татаас хэлбэрээр олгож байна. Нийгмийн даатгал, халамж нийлээд 1.1 их наяд төгрөгийн татаас улсын төсвөөс авч байна. Тийм учраас Олон улсын валютын сантай сайн ярилцаж, асуудлыг шийдэх ёстой. Хөдөө орон нутагт хөрөнгө оруулалт маш их дутагдалтай байна. Ялангуяа сургууль, цэцэрлэг сургуулийн барилга барихад хөрөнгө зарцуулах ёстой. Хүүхэд бүрийг цэцэрлэгт хамруулах ёстой. Энэ утгаараа сургууль, цэцэрлэгт зарцуулах хөрөнгө оруулалтыг дэмжинэ. Миний хувьд нийгмийн даатгалын шимтгэлийг нэмсэнд шүүмжлэлтэй хандаж байгаа. Олон улсын валютын сантай тохирсон тохиролцоо.

Ерөнхий сайд, Шадар сайд, Сангийн сайдын төвшинд ОУВС-тай тохиролцоо хийгээд өөр эх үүсвэрээр орлуулах боломж байх юм бол ОУВС хүлээж авах боломжтой. Харин байр суурьнаасаа буцахгүй гэвэл төвөгтэй болно. Яг үнэндээ бол бид ОУВС-д өөрсдөө гуйж харагдсан шүү дээ. Хэрвээ орлогоороо зарлагаа нөхөөд эх орноо олигтойхон аваад явчихдаг байсан бол ОУВС-гаар заавал хичээл заалгах ямар хэрэг байна” гэлээ.