Өнгөрсөн 2018 оны наймдугаар сарын 9-10-нд шилжих шөнө Зам, тээврийн хөгжлийн яамны Хяналт шинжилгээ, үнэлгээ, дотоод аудитын газрын дарга Т.Гомбосүрэнгийн амь насанд тус яамны газрын дарга Б.Махбал хохироосон байж болзошгүй гэмт хэрэг гарсан. Хэргийн мөрдөн шалгалт дуусаж, нийслэлийн Прокурорын газраас Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1 дэх хэсэгт зааснаар яллах дүгнэлт үйлдэж шүүхэд шилжүүлсэн. Шүүхээс яллагдагч Б.Махбалд холбогдох хэргийн урьдчилсан хэлэлцүүлгийг долоон удаа зарласан боловч хойшлогдоод байсан. Тэгвэл өнөөдөр найм дахь удаагийн урьдчилсан хэлэлцүүлэг болох гэж байна.
Яллагдагч Б.Махбалд Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1 дэх хэсэгт зааснаар яллах дүгнэлт үйлдсэн. Тус хуулийн заалт нь
10.1 дүгээр зүйл. Хүнийг алах,
2.1.онц харгис хэрцгийгээр хэмээн заасан бөгөөд "Хүнийг онц харгис хэрцгийгээр алсан бол 12 жилээс 20 хүртэл хугацаагаар, эсхүл бүх насаар нь хорих ял шийтгэнэ" хэмээн заасан байдаг.
Шүүхийн урьдчилсан хэлэлцүүлэгт шүүгчээр Д.Ренченхорол, яллагдагчаар Б.Махбал, улсын яллагчаар Б.Баярхүү, талуудын өмгөөлөгчөөр Ш.Мягмарцэрэн, Д.Батбаяр, М.Алтанцэцэг, З.Хүрэлсүх, Ч.Отгонбаатар, Н.Баатардорж, хохирогчоор н.Өнөрцэцэг, Д.Доржсүрэн нар оролцоно. Өнөөг хүртэл сунжраад буй уг хэргийн шүүх хуралдаанаас үзвэл яллагдагч Б.Махбалд 12 жилийн ял өгөх магадлал өндөр гэдгийг зарим хуульчид хэлж буй. Учир нь тэрбээр мэдүүлэгтээ санаатай бус, ямар нэгэн өс хонзон байгаагүй гэж мэдүүлсэн гэдгийг хэлсэн юм.
Сэтгэгдэл (20)