Нийслэлийн хэрэгжүүлэх төсөл хөтөлбөр, цаашид хэрэгжүүлэх шаардлагатай ажлын талаар Монгол Улсаас гадаад улсад суугаа элчин сайдуудад танилцуулж, хамтарч ажиллах талаар хотын дарга С.Амарсайхан санал солилцлоо. Үүнтэй холбогдуулан хотын даргаас зарим зүйлийг тодруулснаа хүргэе.

-Нийслэлийн өмнө тулгамдсан асуудлын талаар Элчин сайдуудадтай санал солилцлоо. Ямар үр дүнд хүрсэн бэ?

-Хотын өмнө шийдвэрлэх олон асуудал бий. Тухайлбал, дотоодын бизнес эрхлэгч, баялаг бүтээгчидтэйгээ хамтарч зах зээлийн тогтолцоо зарчмаар нь хотын эдийн засгийг урагшлуулах, ажлын байр бий болгох, айл өрхийг орлоготой болгох, иргэдэд амьдрах таатай борчин бүрдүүлэх шаардлагатай. Мөн гадаад харилцаагаа хөгжүүлэх, хот тосгодын дадлага туршлагыг судалж, давуу болон сул талаа харьцуулж цаг хугацаа хэмнэсэн, бодитой шийдвэр гаргах замаар хотын хөгжлийг түргэтгэхийн тулд гадаад оронд манай улсаа төлөөлөн суугаа элчин сайдын яамдуудтайгаа хамтарч ажиллах нь чухал. Тиймээс Монгол Улсаас гадаад улсаад суугаа 30 гаруй элчин сайд, байнгын төлөөлөгч, ерөнхий консулуудтай уулзаж, нийслэлд хэрэгжүүлэх томоохон төсөл хөтөлбөрүүдээ танилцууллаа.

Нийслэлийн хэмжээнд тулгамдсан асуудлыг шийдвэрлэхэд боловсон хүчний чадавхийг дээшлүүлэх шаардлага бий. Түүнчлэн замын ачааллыг бууруулахтай холбоотой нийтийн тээврийн шийдэл, шинэ технологийг нэвтрүүлэх ажилд хамтарч ажиллах, хоёрдугаарт, нийслэлийн үнэ цэнэтэй боловч балансын үнээр 2, 3 их наяд төгрөгт хүрсэн үнэ цэнэгүй барилгуудыг зах зээлийн эдийн засгийн эргэлтэд оруулах,  шаардлагатай хөрөнгө санхүү босгох, иргэдээ орлогожуулах ажлуудад анхаарч байна. Гуравдугаарт, усны нөөцөөс эхлээд хотын амин сүнс болсон гол дэд бүтцүүдийг шийдвэрлэхэд гадаадын туршлагатай улсуудын зөвлөмж хэрэглээ хэрэгтэйгээс гадна Улаанбаатар хоттой ижил хотууд хэдий хугацаанд асуудлуудаа шийдвэрлэсэн зэргийг судлах ёстой.

-Нийслэлийн бүтээн байгуулалтын хэдэн хувьд нь гаднын хөрөнгө оруулалт шаардлагатай вэ?

-Нийслэлд нэн тэргүүнд шийдвэрлэх шаардлагатай байгаа хот байгуулалт, нийтийн тээвэр, зам, дэд бүтэц зэрэгт багадаа 20 их наяд төгрөгийн хөрөнгө оруулалт шаардлагатай. Ойрын таван жилийн хугацаанд шүү дээ. Үүний 10-аас доошгүй хувийг гаднын хөнгөлөлттэй зээл, буцалтгүй тусламж бусад хөнгөлөлттэй эх үүсвэрээр олж авахын тулд нийслэлийн өмчит аж ахуйн нэгж түүний харьяа байгууллагуудын засаглалыг сайжруулах шаардлагатай. Хариуцлага, хяналт байгаа газар хааанаас ч хөрөнгө мөнгө босгох боломж байна гэж харж байгаа. Тиймээс мэргэжлийн боловсон хүчин бэлтгэх чухал байна.

-Тэгвэл хөрөнгө оруулагчдын зүгээс ямар шаардлага тавьж байна вэ?

-Бэлтгэгдсэн хүний нөөц бий юу, цаг хугацаандаа хийж чадах уу, эрсдэлгүй байх талаар хууль эрх зүйн орчин ямар байна вэ, хөрөнгийн ямар баталгаа байна гэх зэргээр асууж байна. Тиймээс нийслэлийн хөрөнгийн үнэлгээг олон улсын зах зээлийнх нь үнэлгээгээр хийлгэхээр шийдвэрлэсэн. Жишээ нь, Соёлын төвийн барилгын зах зээлийн үнээр 40, 50 тэрбум төгрөгийн үнэтэй бол балансын үнэ нь 13 тэрбум төгрөг байх юм.

Б.Лхам