УИХ-ын чуулганаар Эрүүгийн хуульд нэмэлт, өөрчлөлт оруулах эсэх талаар хэлэлцэж байна. Хэлэлцүүлгээр прокурор мөрдөн байцаагчийн саналаас үл хамааран тухайн хэрэгт холбогдогчийг яллагдагчаар татах эсэх асуудлыг хэлэлцлээ.

О.Баасанхүү: Хуультай холбоотой үг хэлмээр байна. Та микрофоноо барьчихаад маазраад байна.

Г.Занданшатар: Хэлэлцүүлэгтэй холбоотой асуудлаар үг хэлэхгүй байгаа учраас микрофон хаалаа.

О.Баасанхүү: Прокурорт бүрэн эрхт комиссар эрх өгчихсөн байна. Хэрэг бүртгэлийн хэрэг нээсэн мөрдөгч прокурорт бодитой санал оруулж ирж байгаа гэж ойлгож байгаа. Прокурорууд аа, та нар даахгүй нохой булуу хураана гэж нэг гартаа хавтас барьчихаад чадах уу. Өөрийн үзэмжээр шийддэг болох юм байна. Маш олон хэрэг прокурор дээр очоод буцаагддаг. Та нарт эрх мэдэл өгч болно. Гэхдээ эрх мэдэл хуваарилалтаа тэгш өгмөөр байна. Манай улс буцдаг хуультай болчихсон. Хуучин хэрэг бүртгэлт, мөрдөн байцаалтын хүрээнд хэргийг буцаалаа гэдэг байсан бол прокурор буцаадаг болчихсон.

Я.Содбаатар: О.Баасанхүү гишүүн бид хоёр ижил санал хэлэх гээд байна. Мөрдөгч хэрэг бүртгэлийн хэрэг нээгээд үндэслэлгүй гэж үзвэл прокурор яллагдагчаар татна гэж байна. Ингэж болохгүй шүү дээ. Хэрэг бүртгэлийн хэргийг хаая гэдэг санал өгөхөөр хэрэг бүртгэл нээхгүйгээр прокурор яллагдагчаар татчихаж байна. Үүнийг сайн харж лавлаач ээ. Хүний эрхийг зөрчих нь байна шүү дээ.

Х.Нямбаатар: О.Баасанхүү гишүүн ээ, та хуулиа харчих л даа. Хэрэгт холбогдон шалгагдаж байгаа хүний эрхийг хангах үүднээс л ийм хугацаа тавьж өгч байгаа юм. Мөрдөгч өргөдөл, гомдлыг шалгаад илэрхий гэмт хэрэгтэй хэрэгт татгалзах санал гаргавал прокурор үүнийг нягтлаад гурван санал гаргах юм.

Б.Лхам