Хөдөлмөрийн аюулгүй ажиллагааны талаар МХЕГ-ын Хөдөлмөрийн хяналтын улсын ахлах байцаагч С.Баяраатай ярилцлаа.

-Энэ оны байдлаар хөдөлмөрийн аюулгүй байдалтай холбоотой хэчнээн осол гарсан бэ?

-Мэргэжлийн хяналтын байгууллага цахим системээрээ дамжуулан үйлдвэрийн ослын судалгааг олон нийтэд нээллтэй байршуулдаг. Уг цахим системээр статистикийн мэдээллийг бүрэн авах боломжтой гэсэн үг. Энэ сарын 19-ний өдрийн байдлаар 314 үйлдвэрлэлийн осол бүртгэгдсэн байна. Эдгээрийн 47 хувь нь амиа алдсан осол байна. Хэдийгээр хүн амиа алдаагүй ч 137 хүн хүнд, 130 хүн хөнгөн гэмтсэн байна.

-Тухайлбал аль салбарт үйлдвэрийн осол хамгийн өндөр байна вэ?

-Төр захиргааны байгууллагад 19 осол гарсан байна. Энэ нь голдуу өвлийн улиралд ажилтан ажилдаа ирэх, буцахдаа гэмтсэн осол юм. Уул уурхайн салбарт ослын хэмжээ өндөр байна. Тухайлбал, Уул уурхайн салбарт өнөөдрийн байдлаар 73 осол бүртгэгдсэн бол барилгын салбарт 37, ус хангамжинд 58 осол гарсан байна. Уул уурхай, дэд бүтэц, барилгын салбарын үйл ажиллагаа нэмэгдэх тусам ослын магадлал өсч байгаа нь харагдаж байна.

-Дээрх ослыг өмнөх оны мөн үетэй харьцуулахад ямар байна вэ?

-Өнгөрсөн жилийнхээс нийт тоогоороо өссөн гарч байна. Тухайлбал, өнгөрсөн онд 286 осол гарч байсан. Эндээс үйлдвэрлэлийн ослын тоо хэмжээ нэмэгдэж байгааг харж болно. Гэхдээ 10000 ажилчинд ногдох коэффицентээрээ буурсан үзүүлэлттэй байна. Өөрөөр хэлбэл, хөдөлмөр эрхэлж байгаа хүний тоо нэмэгдсэнтэй холбогдуулан өсч байна. Тиймээс аж ахуйн нэгж байгууллага урьдчилан сэргийлэх арга хэмжээ авах, үйлдвэрлэлийн ослоо тэглэх зорилго тавин ажиллах ёстой.

-Нийт ослын ихэнх нь уул уурхай, барилгын салбарт гарч байна гэж байна. Ажилчдынхаа аюулгүй байдлыг хангаж чадахгүй байна гэсэн үү. Шалтгаан нь юунд байна вэ?

-Тийм. Эко Алтан заамарт гарсан ослын улмаас дөрвөн иргэн, Төв цэвэрлэх байгууламжид гэхэд дөрвөн хүн амиа алдлаа. Олон улсад ажиллах хүчний тоогоор ослын тоог тооцдог болсон. Хөдөлмөрийн байгууллагын зөвлөмж, улс оронд осолд өртсөн хүний тоогоор нь тооцдог болсон нь өсөхөд нөлөөлж байгаа юм.

-Эко Алтан Заамарт гэхэд хэд хоногийн өмнө нэг ажилчин нь амиа алдлаа. Салбарын сайдын зүгээс удаа дараа хариуцлага алдсан уг уурхайг хаах хүртэл арга хэмжээ авна гэлээ. Мэргэжлийн хяналтын байгууллагаас ямар дүгнэлт гаргасан бэ?

-Том осол гарсан уурхай хаасан байгаа. Сая гарсан осол Булган аймгийн нутаг дэвсгэрт гарсан өөр лицензтэй уурхай юм. Эхний осол уул уурхайн үйл ажиллагаатай холбоотой гарсан. Сүүлд гарсан осол механик цех дээр краныг өргөх үед оосор нь тасарч осол гарсан гэсэн урьдчилсан дүгнэлт бий. Тиймээс үндсэн уурхайн олборлолттой холбоогүй гарч ирж байгаа. Энд зөрчлийг арилгуулах хүртэл Булган аймгийн мэргэжлийн хяналтын байгууллагын байгцаагч үйл ажиллагааг нь түр зогсоох арга хэмжээ авсан. Гарсан зөрчилтэй нь холбогдуулж асуудлыг шийдэхээс биш өмнө нь гарсан асуудалтай холбогдуулан цуцлана гэх асуудал байхгүй. Тухайн осол дээр Булган аймаг дахь байцаагчид ажиллаж байгаа.

-Туул голын онцгой бүсэд линцензтэй гэсэн асуудал яригдаж байсан. Нутгийн иргэдээс уг лицензийг цуцлуулах төлөөр ихээхэн тэмцэл өрнүүлсэн  шүү дээ. Энэ асуудал юу болсон бэ?

-Том ослын дүгнэлт, үйл ажиллагааг зогсоох акт гарсан. Тухайн лицензийн талбай дээр үйл ажиллагаа явуулахгүй байгаа гэсэн үг. Дарагдсан техникээ ч авч чадахгүй байгаа шүү дээ.

-Налайхын уурхайг хаах арга хэмжээ авч байгаа юм билээ. Одоо хэчнээн уурхай үйл ажиллагаа явуулж байгаа вэ?

-Аяндаа борлуулалтгүй болчихвол үйл ажиллагаа нь зогсоно шүү дээ. Хөдөлмөрийн аюулгүй байдлын талаар ирсэн мэдээлэл бүртгэгдээгүй байна. Уурхайн үйл ажиллагааг зогсоох эсэх асуудлыг өөр алба хариуцдаг.

Б.Лхам