Засгийн газрын ээлжит хуралдаанаар Монгол Улс, Бүгд Найрамдах Франц Улсын Засгийн газар хооронд байгуулсан Санхүүгийн хэлэлцээрийг соёрхон батлах тухай хуулийн төслийг дэмжиж, УИХ-д өргөн мэдүүлэхээр болсон. Тэгвэл УИХ-ын өнөөдрийн чуулганаар хуулийн төслийг хэлэлцэж баталлаа.

Ингэснээр хэт хүйтэнд гал унтраах, олон зориулалт бүхий /нефть бүтээгдэхүүн, түүнийг хадгалдаг агуулах, бусад онц чухал обьектын гал унтраах/ тусгай зориулалтын 40 гаруй автомашин нийлүүлнэ. Мөн Онцгой байдлын байгууллага эрэн хайх, аврах, эмнэлгийн тусламж үзүүлэх Airbus EC-145 загварын гурван нисэх онгоцтой болох юм. Төслийн хүрээнд нисгэгч, эмч нарыг сургаж бэлтгэхээр төлөвлөсөн байна.

Чуулганы үеэр УИХ-ын гишүүд асуулт асууж, Онцгой байдлын ерөнхий газрын дарга, хошууч генерал Т.Бадрал хариулсан юм. Тухайлбал, Франц улсын тусгай нисэх хүчний багийнхан Монголд ирж нисгэгчдийг бэлтгэж сургана гэдгийг ОБЕГ-ын дарга, хошууч генерал Т.Бадрал хэлсэн.

Х.Болорчулуун: Дорнодын нэг онцлог нь уртаашаа сунасан газар нутагтай. Бүгдийг нь нийслэлд биш,  баруун тийшээ төвлөрүүлэх шаардлагатай. Цаашид техник талаасаа төлөвлөх зүйл юу байна вэ?

Т.Бадрал: Онгоцны үндсэн бааз нь нийслэлд байрлана. Хавар, намрын түймрийн үед бүсийн төвд байрлуулна. Тараан байршуулна гэдэг нь цаг хугацааны хувьд хэмнэлттэй.

Х.Болорчулуун: Дорнод аймагт нэг битгий хэл, онгоц байх боломжтой. Байр сав нь бэлэн шүү дээ. Хамгийн их түймэр гардаг. Энэ талаар бодолцож үзээрэй.

Б.Лхам