Сүхбаатар дүүрэгт түлшний хомсдол ихээхэн үүсчээ. Тодруулбал, тус дүүрэгт 31 цэг байгаагаас хамгийн удаан хугацаагаар түгээлт ирээгүй 16 дугаар хороо, Бэлхийн 33-т арваннэгдүгээр сарын 28-аас хойш түлш ирээгүй аж. Тус хороонд найман цэг үйл ажиллагаа явуулж байгаагаас одоогоор дөрөв нь түлшгүй байгаа юм.
Түлш тасалдах болсон шалтгаан нь “Тавантолгой түлш” ХХК-ийн үйлдвэр дээр цахилгааны эх үүсвэрээс үүдэлтэй доголдолтой холбоотой гэж албаныхан тайлбарлаж байв. Тиймээс үүссэн нөхцөл байдалтай холбогдуулан хотын дарга С.Амарсайханы үйлдвэрийн бүх шугамыг бүрэн ажиллуулах үүрэг даалгаврын дагуу ийн 12 шугам ажиллаж эхэллээ.
Түлш борлуулах цэгүүдийн түлш тасарч иргэд нэг газраас нөгөө рүү очиж, түлштэй золгодог байсан бол удахгүй асуудал хэвийн түвшинд очих нь хэмээн итгэл тавин сууна. Түлшний хомсдол үүсээд байсан Баянзүрх дүүргийн IX хорооны түлш борлуулах цэгт очиход хангамж нь сайжирсан харагдаж байлаа. Борлуулагч “Ихэнх өдөр иргэдэд хоёр шуудай түлш өгч байгаа” гэсэн юм. Юутай ч ойр хавьд түлшний хомсдол алга болжээ. Өмнө нь автомашины уртаас урт цуваа түлш авахаар дугаарлаж “Нэгийг өгчихөөч, тэр хоёрыг авчихлаа, танай түлш дуусчихсан юм уу, хэзээ ирэх юм бэ” хэмээн бухимдаж байсан бол энэ амралтын өдрүүдийн хувьд байдал хэвийн харагдана.
Түүнчлэн түлшний хомсдолыг далимдуулан түүхий нүүрс жижиглэнгээр борлуулах ашиг хонжоо хайгчид бий болжээ. Торуулбал, НМХГ, НОБГ-ын мэдээллээр түүхий нүүрс хэрэглэх зөвшөөрөлтэй аж ахуйн нэгжийн үйл ажиллагаанд тавих хяналт шалгалтыг эрчимжүүлнэ хэмээн мэдэгдэж байсан. Энэ хүрээнд иргэдээс ирсэн мэдээлэл болон хяналт шалгалтын явцад 96 айл өрх, ажи ахуйн нэгжээс түүхий нүүрс илрүүлж лацдажээ.
Үүнээс 28 тонн нүүрсийг худалдан авч, 76.5 тонн нүүрсийг Төв аймгийн нутаг дэвсгэр рүү нүүлгэсэн байна. Мөн хэрэгцээгүй болж чулуужсан нүүрс байсан аж.
Ямартай ч түлш үйлдвэрлэлийн хүчин чадал нэмэгдлээ. Одоо нийслэлийн удирдлагын захирамжаар хомсдол үүссэн цэгийг хомсдолгүй болгохоор ханцуй шамлан ажиллаж байна. Энэ ч утгаараа тун удахгүй нийслэл түлшний хомсдлоос гарах нь ээ.
Б.Лхам
