Ерөнхий сайд асан Ч.Сайханбилэгийг Оюутолгойн хөрөнгө оруулалтын гэрээ болон Дубайн гэрээтэй холбоотой асуудлаар Авлигатай тэмцэх газраас 2018 оны дөрөвдүгээр сарын 10-нд баривчлан саатуулсан. Шүүхийн тогтоолоор түүнийг хоёр сар гаруйн хугацаанд цагдан хорьж шалгасны эцэст таслан сэргийлэх арга хэмжээ авч, хилийн хориг тавьсан байдаг. 

Энэ хугацаанд Ерөнхий сайд асан Ч.Сайханбилэг эрүүл мэндийн шалтгаанаар гадаадад эмчилгээ хийлгэх шаардлагатай учраас хилийн хоригоо цуцлуулах хүсэлт хүргүүлснийг шүүхээс хангаснаар тэрбээр БНСУ-ыг зорьсон юм. 

Гэвч Ерөнхий сайд асан Ч.Сайханбилэгийн эх орондоо ирэхээр товлосон хугацаа удаа дараа хойшилж, БНСУ-д бус өөр улсад оршин сууж байгаа учраас АТГ-аас оргон зайлсан гэж үзэн Интерполоор эрэн сурвалжилж, оршин суугаа байршлыг нь тогтоолгох хүсэлтийг холбогдох олон улсын байгууллагуудад хүргүүлжээ.

Авлигатай тэмцэх газрын урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү хэлснээр “Ерөнхий сайд асан Ч.Сайханбилэгийн байгаа байршлыг тогтоосон. Арванхоёрдугаар 20-д гаргаад ирэх асуудал яригдсан. Одоогоор ирээгүй байна. Хэрвээ ирэхгүй бол бид холбогдох хуульд заасны дагуу дараагийн арга хэмжээг авна. Хуулийн хүрээнд албадан эх орондоо авчрах боломж байгаа” гэсэн хариу өгчээ.

С.Сүлд