Тайз дэлгэцийн урлагийг өөрийн гэсэн өнгө төрхөөр чимж, дүрээ мөнхөлсөн П.Бат-Амгалан. Түүнийг ихэнх үзэгч Томоо гэдгээр нь андахгүй мэднэ биз. Тэрбээр сайн жүжигчнээс гадна спортын төрөлд гялалзаж яваа нэгэн юм. Тодруулбал,  пауэрлифтингийн “Raw Classis” төрлийн насанд хүрэгчдийн улсын аварга шалгаруулах тэмцээний гурван удаагийн аварга, Азийн аварга шалгаруулах тэмцээний хоёр удаагийн аварга, Дэлхийн аварга шалгаруулах тэмцээний дөрөвдүгээрт байрт тус тус шалгарч байсан амжилттай. Ингээд түүнтэй хэсэг хором ярилцсанаа хүргэе.

-Та хэд хэдэн тайз дэлгэцийн уран бүтээлд дүр бүтээж байсан. Энэ ч утгаараа таныг ихэнх хүмүүс мэргэжлийн жүжигчин гэж боддог шүү дээ. Та яг ямар мэргэжилтэй хүн бэ?

-Би мэргэжлийн жүжигчин биш. 58 дугаар сургуулийн наймдугаар ангийг төгссөн жирийн л нэг залуу. Тухайн үед бие их өвддөг байсан учраас сургуулиасаа гарч цааш нь сурч чадаагүй юм. Би айлын бага хүүхэд. Дээрээ нэг ахтай. Тиймээс айлын бага, бие муутай гээд зүгээр суугаад байж болохгүй гэж бодоод спортоор хичээллэхээр шийдсэн юм. Ингээд 2001 онд чөлөөт бөхөөс спортын гараагаа эхлүүлж байлаа.

-Спортоор хичээллэснээс хойш ямар үр дүн гарав. Одоо зовиуртай зүйл бий юу?

-2001 онд манай сургуулийн багш “Чи барилдах хүүхэд байна. Би чамайг Д.Адъяатөмөрийн хүү А.Хоролсүрэн шавь оруулна” гээд Спортын төв ордон дэр очиж байсан. Ингээд л А.Хоролсүрэн багшийн шавюь болсон доо. Тэр намайг спортын дэвжээнд алхуулсан анхны багш минь юм. Дээр дурдсанчлан бие султай, амархан өвддөг хүүхэд байсан учраас спортоор хичээллэхэд зөв л хийхгүй бол гэмтэх, бэртэх эрсдэл өндөр байсан. Гэхдээ яахав мэдээж зориод ирсэн юм чинь чадна л гэж өөрийгөө зоригжуулдаг байлаа. Одоо бодоход спорт л намайг өдий зэрэгтэй авч явж, тэвчээр гэдэг зүйлийг өгсөн гэж боддог. Би А.Хоролсүрэн багшийнхаа зааварчилгаагаар чөлөөт бөхийн спортоор найман жил хичээллэсэн. Энэ үед би бие бялдрын хөгжлийн хувьд бусад найзуудаасаа арай илүү хүүхэд байсан.

-Тухайн үед ангийнхан нь хэрхэн хүлээж авч байсан бэ?

-Нийгмийн хөгжил ч сул байсан юм уу хүн бүрийн л доог тохуу болдог байлаа. Хүүхдүүд янз бүрээр дуудна. Хоч өгнө. Би ч их ичиж, хямарна. Бүр хэдэн өдөр гутрах ч үе бий. Хүмүүсийн хандлагыг давж гарах зориг, тэсвэр тэвчээрийг спортоосоо л олж авсан. Одоо бол нийгэм арай өөр болсон юм уу гэж хардаг юм. Кинонд тоглосноос хойш ч юм уу нийгмийн хандлага, олон нийтийн хүлээж авах байдал нь эсрэгээрээ санагддаг болсон.

-Таныг хүүхэд байхад чинь буруу эмчилгээ хийснээс болж биед тань өөрчлөлт өгсөн гэж сонссон?

-Тухайн үед ханиад хүрээд хүчтэй антибиотик тарьдаг байсан юм. Үүнээс болж мэдээ алдаад сонсгол муудаж, бүр ярьж чадахгүй болж байсан. Гэхдээ өөрсдийнхөө буруугаас л болж өвдсөн учраас үүнд эмч нарыг буруутгадаггүй юм.

-Таныг “Ар хударга” кинонд дүр бүтээснээр чинь ихэнх уншигч, үзэгч мэдэх байх. Яаж энэ кинонд тоглохоор болсон юм бэ?

-2015 оны наймдугаар сарын эхэн үед “Ар хударга” киноны продюсер Д.Болдбаатар ах санал тавьсан юм. Түүнтэй 2011 онд анх фитнесст дээр танилцсан бөгөөд кинонд тоглох санал тавих үеэр хэзээний танилууд болсон байлаа. Энэ нь нөлөөлсөн байх гэж боддог.

-Энэ кинонд тоглосноос хойш таныг нийгэмд хүлээж авах хандлага ямар болсон бэ?

-Нэг бол магтаад л эсвэл муулаад л янз бүр л байдаг. Сүүлдээ бүр тоохоо ч боличихдог юм билээ. Гол нь хүмүүсийн сөрөг хандлагыг хэрхэн хүлээж авах нь тухайн хүний сэтгэлийн л асуудал шүү дээ. Тиймээс би л сэтгэлийн хаттай байж, баргийн зүйлд нугарахааргүй байх ёстой л гэж боддог.

-Залуус сэтгэлээр унах үедээ согтууруулах ундаагаар тайтгаруулах гэж оролддог. Таны хувьд энэ асуудлыг хэрхэн шийддэг вэ. Муу зуршил бий юу?

-Миний хувьд тайвшрах арга бол дуртай зүйлээ хийх. Бухимдсан үедээ бэлтгэлээ л хийдэг. Бэлтгэл хийхээр их ядарна. Энэ үед хүний стресс тайлагддаг юм. Тиймээс өөрийнхөө хамгийн сайн чаддаг эсвэл хийх дуртай зүйлээ хийхэд уур бухимдал цаг зуурын л асуудал гэж боддог.

-“Ар хударга” кинонд тоглосноос хойш кинонд тоглох санал хэр ирэв?

-Таван кинонд тоглох санал ирж, тоглосон. Мөн хэдхэн хоногийн өмнө клипэнд тоглосон.

-Ямар дүр голчлон бүтээж байна вэ?

-Ихэвчлэн киноны эсрэг дүр ирдэг юм. Эсрэг зохидог юм шиг байгаа юм. Миний дүр бүтээсэн киноны ихэнх нь мафитай ч юм уу, зодолдсон дүр байдаг.

-Пауэрлифтингийн спортоор чамлахааргүй амжилт гаргасан хүн бол та. Ялангуяа оролцсон тэмцээн бүрээсээ хоосон буцаж үзээгүй гэдгийг мэдэх юм байна?

-Фитнессийн төрлөөр 2011 оноос хойш хичээлэж эхэлсэн. Нуруу их өвддөг байсан учраас чөлөөт бөхөөсөө гурван жил завсарласан юм. Энэ талаар багшдаа хэлэхэд хөдөлгөөний дутагдалд орсон байна. Фитнессийн төрлөөр хичээллэж үзэх үү гэсэн юм. Хүн хөдөлгөөний дутагдалд орохоор бие их өвддөг юм билээ. Энэ үед л сайн ойлгож авсан даа. Ингээд фитнессээр хичээллэж эхэлсэн. Улмаар пауэрлифтингийн тэмцээнд 2017 оноос хойш оролцож гурван жил дараалан улсын аваргын тэмцээнд түрүүлсэн.  Шахалтын тэмцээнээр Ази тивд хоёр удаа түрүүлж, Дэлхийн аваргын тэмцээнд дөрөвдүгээр байранд орсон.

-Бэлтгэлээ хэрхэн хангадаг вэ?

-Би фитнессийн багш хийж байгаа учраас ажлынхаа заваар бэлтгэл хийдэг. Ер нь бэлтгэлээ өөрсдөө л хангадаг юм.

-Ер нь пауэрлифтингийн сдпортны төрөлд цаашид анхаарах шаардлагатай зүйл юу гэж бодож байна вэ?

- Пауэрлифтингийн спорт багийн төрөл байх нь чухал. Учир нь хүнд даац, шахалт, өргөлтөд дасгалжуулагч ч юм уу багийн ажиллагаа их чухал санагддаг. Зөв хийхгүй бол гэмтэх эрсдэл өндөр шүү дээ.

-Ирэх оны тэмцээнүүдээсээ дурдвал?

-2020 оны нэгдүгээр сарын 7-нд пауэрлифтингийн Raw CLassis насанд хүрэгчдийн улсын аварга шалгаруулах тэмцээн болно. Жиндээ дахин түрүүлнэ гэсэн бодолтой байна. Өрсөлдөгчид ч улам чангарч байна. Бүгдэд нь амжилт хүсье. Дараагийн тэмцээнүүд нь удахгүй зарлагдах байх.

-Бэлтгэлийн хувьд хангагдсан гэж үзэж байна уу. Жингээ ахиулах боломжтой юу?

-Боломжтой. Гэхдээ бэлтгэлээ ганцаараа хийж байгаа учраас багийн төрөлтэй болохыг л хүсч байна. Амжилтаа өсгөх магадлал өснө шүү дээ. Шахалтын төрлөөр дэлхийн дээд амжилт нь 175кг байдаг юм. Миний хувьд 150 кг. Жиндээ 59 дүгээрт ордог. Өнгөрсөн хавар Япон улсад болсон тэмцээнд дөрөвдүгээр байранд орсон учраас дэлхийн медальтан болоход ойрхон байна л гэж өөрийгөө урамшуулдаг юм.

-Тамирчин хүний сэтгэл зүй маш чухал. Сэтгэлээр унах үе их байдаг байх. Энэ бүрт урам зориг, босох хүчийг хаанаас авдаг вэ?

-Ээж аав, хамт олны дэмжлэг маш чухал. Ээж, аав хоёр минь миний хамгийн том фен. Миний хүү чадна гэж хэлэх бүрт би улам зоригжиж, хурцлагдаж байдаг юм. 

-Таны оролцохоор бэлдэж буй тэмцээн хаяанд иржээ.  Бэлтгэлдээ хэдэн цаг зарцуулж байна вэ?

-Бэлтгэлийг өдөрт 2-3 цагийн хугацаанд хийдэг. Одоо тэмцээнд дөхсөн учраас булчингаа амраахын тулд долоо хоногт 3-4 хоногт нь бэлтгэл хийж байгаа.

-Ер нь холбооноос тамирчдаа хэр зэрэг дэмжиж байна вэ. Тэмцээнийхээ зардлыг хэрхэн шийддэг вэ?

-Манай холбоо их шударга л даа. Үүгээрээ бусад спортоос давуу талтай гэж боддог. Түрүүлсэн тамирчдаа дараагийн тэмцээнд нь авч явдаг. Найраа байхгүй гэж ойлгож болно. Тэмцээний зардлын хувьд холбооноос боломжоороо дэмжлэг үзүүлдэг. Гэхдээ ихэвчлэн өөрсдөөсөө л хөрөнгө оруулалт хийдэг дээ.

Б.Лхам