Улсын бүртгэлийн ерөнхий газраас 3.3 сая иргэн, 1.1 сая эд хөрөнгө, 194 мянга хуулийн этгээдийн мэдээлэл буюу 150 сая хуудас материал бүрэн цахимжуулж, гадаадын хөрөнгө оруулалттай 216 компани бүртгүүлсэн талаар мэдээлэл хийлээ. Улсын бүртгэлийн ерөнхий газрын дарга Б.Баасандорж энэ талаар "Өнгөрсөн 2018 онд гадаадын хөрөнгө оруулалттай 484 компанид шалгал хийж, зөрчилтэй 139 компанийн бүртгэлийг хүчингүй болгосон. Шалгалтаар бүртгэлийн мэдүүлэг өгөхдөө хуурамч бичиг баримт бүрдүүлсэн, хуулийн шаардлага хангаагүй зэрэг зөрчил илэрсэн. Үүнийг цагдаагийн байгууллага шалгаж байна. Мөн Татварын багц хууль хэрэгжиж эхлэх гэж буйтай холбогдуулан эцсийн өмчлөгчийг бүртгэж эхлэх гэж байна. Улсын хэмжээнд 194 мянга гаруй хуулийн этгээд бүртгэлтэй. Эдгээр нь хуулийн этгээд эцсийн өмчлөгчөө 2021 оны нэгдүгээр сард багтаан бүртгүүлэх ёстой. 

Хуулийн этгээдийн эцсийн өмчлөгч гэдгийг тухайн аж ахуйн нэгжийн хувьцааны дийлэнх хэсгийг дангаараа болон бусадтай хамтран эзэмшиж, үйл ажиллагааг удирдан чиглүүлж, ашиг шимийг хүртэж буй этгээдийг ойлгох ёстой.  Хуульд зааснаар эцсийн өмчлөгчөө ташаа мэдүүлбэл Эрүүгийн болон Зөрчлийн хуулиар хариуцлага хүлээлгэнэ" гэлээ. 

Г.Алимаа