АТГ-аас Дотоод хэргийн их сургуулийн зарим багш нарыг бусдыг зуучлах байдлаар сургуульдаа элсүүлэн залилсан хэргээр шалгаж буй.

Тэгвэл хэргийн мөрдөн шалгалт дуусаж, нийслэлийн Прокурорын газраас яллах дүгнэлт үйлдэн, Баянзүрх дүүргийн Эрүүгийн хэргийн анхан шатны шүүхэд шилжүүлсэн байна. Хэргийн шүүх хурал өнөөдөр буюу энэ сарын 27-нд  хэлэлцэхээр товложээ.

Тодруулбал, Б.Энхжаргал, Б.Амгаланбаяр, Г.Болормаа, Ж.Баярзул, С.Уранчимэг, О.Байгальмаа, З.Ариунжаргал, Ч.Цэдэндамба, Ч.Цэндхүү нарт Эрүүгийн хуулийн 22.5.1-ийн “Өөртөө болон бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан эд зүйл өгсөн”, 22.4-4 дэх хэсэгт заасан “Нийтийн албан тушаалтан хахууль өгөгчийн ашиг сонирхлын үүднээс гүйцэтгэх ёсгүй үйлдлийг хийхийн тулд шууд болон бусдаар дамжуулан хахууль авсан”, 17.3-1- дэх хэсгийн бусдыг залилсан гэх үндэслэлээр яллах дүгнэлт үйлдээд байна.