ХЗДХ-ийн сайд өнгөрсөн баасан гарагт Цагдаагийн ерөнхий газрын төв байрны алба хаагчидтай уулзалт зохион байгуулах үеэр зарим алба хаагчдаа шагнасан билээ. Энэ үеэр гурван өрөө байраар шагнуулсан, найман хүүхдийн аав ахлагч Б.Гүррагчаатай хэсэгхэн хорим ярилцсанаа хүргэе.

-Байраар шагнууллаа. Танд болон таны гэр бүлд баяр хүргэе?

-Баярлалаа. Хөл газар хүрэхгүй баярлана гэдэг нь болж байна. Юу гэж ярихаа мэдэхгүй, яриа ч эвлэхээ больдог юм байна. /инээв/

-Та өөрийгөө манай уншигчдад товч танилцуулахгүй юу?

-Би Дотоодын цэргийн 805 дугаар ангид аюултай ачаа хамгаалах үндсэн чиг үүрэгтэй газар эргүүлчин ахлагч хийдэг юм.

-Байраар шагнах талаар өмнө нь сураг сонсож байв уу?

-Ёстой мэдээгүй. Өмнөх өдөр нь Увс аймаг руу тээвэрлэлтэд яваад ирж явсан. Гэтэл дарга гэнэт залгаад өглөө 10.30 цагт бэлэн байгаарай гэж хэлсэн. Дарга хэдэн цагт бэлэн бай гэнэ, тэр цагт нь бэлэн зогсох ёстой. Тэгсэн гэнэт байр болоод явчихсан. Бүр гайхаад "Үгүй байлгүй дээ" гэж бодтол бүр гурван өрөө байраар шагнана гэдэг юм байна. Сонсоод итгэж чаддаггүй, бараг л ухаан алдах шахсан.

-Гэргийдээ дуулгах мөчийг санаж байна уу?

-За ёстой мэдэхгүй. Итгэж өгөхгүй, амаа ангайгаад л зогсоод байсан санагдана. Одоо бодохоор инээд ч хүрэх шиг. Зүүд шиг л санагдаж байна. Хүүхдүүд бол бүүр хөөрхөн. "Аав аа, бид байранд амьдрах юм уу. Одоо нүүх юм уу. Шинэ оноо шинэ байрандаа гаргах юм уу" гээд тал талаас шаагилдаж асуугаад л. Хэн хэнтэй хамт нэг өрөөнд орох уу гээд л. Зарим нь бүр өрөөндөө "өрх" тусгаарлах юм яриад л. Бүгдээрээ аз жаргалтай инээж хөөрсөн л хүмүүс байна.

-Танайх найман хүүхэдтэй. Ийм олон хүүхдийг өсгөх амаргүй л байх. Хүүхдүүд нь хэдэн насны зөрүүтэй бэ?

-Олон хүүхэд биендээ ханьтай, нэг нэгнийгээ гээд хурдан өсөж томордог юм байна лээ. Хүүхдүүд маань 2-12 насны хооронд. Хоёр удаа ихэрлэсэн. Хүүхдүүдийн зарим нь нэг насны зөрүүтэй учраас эхнэр ажил хийж чаддаггүй. Эхнэр минь миний ард бат зогсож, ар гэрийнхээ асуудлыг зохицуулж өгдөг учраас миний хувьд гэр бүлийнхээ төлөө л хичээдэг. Энэ хичээл зүтгэлийн минь үр дүн гарсанд баярлаж байна.

-Танай гэр бүл хаана амьдардаг юм бэ?

-Эгчийнхээ хашаанд гэрт амьдардаг.

-Байрандаа хэзээ нүүж орох төлөвлөгөөтэй байна?

-Амгалан хотхонд гурван өрөө байр өгсөн. Ирэх оноос орох байх.

-Цагдаагийн алба цаг наргүй учраас гэр бүлдээ зарцуулах цаг зав дутмаг байдаг юм билээ. Таны хувьд гэр бүлдээ хэрхэн цаг гаргадаг бэ?

-Томилолтоор их явдаг учраас янз бүр байдаг. Томилолтоор яваагүй үед ихэвчлэн ажлын найман цагаар ажилладаг. Тараад л гэрийнхээ зүг "гүйдэг" дээ.

-Цагдаагийн албыг хэдэн жил хашиж байна вэ?

-2005 онд Дотоодын цэргийн 805 дугаар ангид хугацаат цэргийн алба хаасан. 2006 оноос одоог хүртэл ажиллаж байна. 2014 оны дөрөвдүгээр сарын 1-нээс Дотоодын цэргийн анги цагдаагийн байгууллага руу шилжиж, улмаар 2017 оноос дахин байгуулагдсан юм. Миний хувьд ус хангамжийн эх үүсвэрийн салбарт харуулчин хийж байгаад ачаа тээш тээврийн замд харгалзан хүргэх IV салбарт эргүүлчин ахлагчаар ажиллаж байна. Энэ хугацаанд Батлан хамгаалах яамны “Эх орны төлөө”, “Дотоодын цэргийн албаны төлөө”, “Цагдаагийн албаны төлөө”, Монголын Залуучуудын холбооны “Эр зоригийн алдар”, “Тэргүүний залуу” алтан медаль зэргээр шагнуулж байсан. 

Б.Лхам