Энэ жилийн элсэлтийн ерөнхий шалгалтыг наймдугаар сарын 19-22-ны хооронд зохион явуулах тов гарсан. Үүнтэй холбоотой асуудлаар Боловсролын Үнэлгээний төвийн Элсэлтийн ерөнхий шалгалт хариуцсан ахлах мэргэжилтэн М.Болдсайханаас тодрууллаа.
-Элсэлтийн ерөнхий шалгалт удахгүй эхлэх гэж байна. Бэлтгэл ажил бүрэн хангагдсан уу?
-Улсын хэмжээнд 81 шалгалтын байранд шалгалт зохион байгуулахаар бэлдсэн. Долоодугаар сарын 1-4-ний өдрүүдэд болох байсан шалгалтын хуваарь өөрчлөгдсөнтэй холбогдуулан дахин хуваарилалт хийсэн. Тиймээс шалгуулагчид шинэчилсэн суудлын хуваарийг хэвлэж авчран шалгалтад орно. Нэг анги танхимд 12-15 хүүхэд 1.5-2 метрийн зайд суухаар зохицуулалт хийсэн.
Мөн нэг ангид дунджаар 600 гаруй хүүхэд, эцэг эхийг нь оруулаад 1000 гаруй хүний бөөгнөрөл үүсэх байсныг зохицуулсан. Хоёрдугаарт, хүүхэд тус бүрд шалгалтын байранд ирэх цаг зэргийг ялгаатай зааж өгсөн. Ингэхдээ шалгуулагчдын халууныг хэмжих, асуумж бөглүүлэх зэргээр эрүүл мэндэд нь хяналт тавьж дотогш нэвтрүүлнэ. Ингэхдээ шалгуулагчдыг амны хаалт зүүсэн байхыг шаардана. Шалгалтын байр бүрд агар ариутгагч, гар ариутгагч, цэвэрлэгээний иж бүрдлийг хүүхдийн тоотой нь уялдуулан хуваарилсан.
-Шалгуулагчдаас монгол хэл, бичгийн шалгалт авах уу?
-Монгол хэл, бичгийн шалгалтыг өнгөрсөн гуравдугаар сард Засгийн газрын тогтоолоор энэ жил цуцалсан. Тиймээс шалгуулагчид монгол хэл, бичгийн шалтгалтгүйгээр сургуульд элсэх боломжтой. Энэ жилийн элсэлтийн ерөнхий шалгалт наймдугаар сарын 19-нд монголын түүх, англи хэлний хичээлээр 10.00 цагаас эхэлнэ.
-Шалгалтад ирэхдээ юу авчрах шаардлагатай вэ?
-Хүүхдүүд шалгалтад ирэхдээ Боловсролын үнэлгээний төвөөс заасан дөрвөн төрлийн бичиг баримттай ирэх ёстой. Тухайлбал, бүртгэлийн хуудас, суудлын хуваарь, иргэний үнэмлэх, бүрэн дунд боловсролын үнэмлэхтэй ирнэ. Бусад харандаа, баллуур зэрэг шаардлагатай хэрэгслийг Боловсролын үнэлгээний төвөөс өгнө.
-Халдвар авсан, гэрээр эмчлүүлж байгаа хүүхдүүдийг шалгалтад хэрхэн хамруулах вэ?
-Энэ талаар Эрүүл мэндийн яамны албан ёсны хариуг хүлээж байна. Наймдугаар сарын 9-өөс өмнө өвдөөд 19-ний эдгэрсэн бичиг баримттай ирвэл шалгалтад оруулна. Харин дээрх хугацаанаас хойш халдвар авсны улмаас шалгалтад орох боломжгүй болсон тохиолдолд тэдгээр хүүхдүүдэд зориулсан дахин шалгалтыг есдүгээр сарын 2-5-ны хооронд дахин зохион явуулахаар төлөвлөж байна. Гэхдээ улсын хэмжээнд хэчнээн хүүхэд өвчилсөн, өвчилж болзошгүй байгаа зэрэг мэдээллийг Эрүүл мэндийн яамнаас авсны дараа дахин шалгалтыг хэрхэн авах талаар шийднэ. Ингэхдээ дахин шалгалтад коронавирусээр өвчлөөд өмнөх шалгалтдаа хамрагдаж чадаагүй хүүхдүүдийг л хамруулна.
-Шалгалтын сэдэв ямар байх вэ. Дэлхий нийтэд үүссэн нөхцөл байдалтай холбогдуулан сурагчид сүүлийн хоёр жил хугаацаанд хичээлийнхээ дийлэнхийг цахимаар судаллаа шүү дээ?
-2019-2020 оны сэдэв, даалгаврууд хоорондоо нэлээд ялгаатай. Учир нь 2019 оны элсэлтийн ерөнхий шалгалт зохион явуулахад тухайн үед ямар ч өвчин байгаагүй учраас хичээлийн агуулгаа 100 хувь судалсан гэж үзэн шалгалтын даалгаврыг боловсруулж байсан. Харин 2020 онд хүүхдүүд хичээлийнхээ агуулгыг 50 хувь судалсан жил байсан учраас элсэлтийн ерөнхий шалгалтад 10, 11 дүгээр ангийн хичээлийн агуулгыг 100 хувь хамруулаад 12 дугаар ангийн танхимаар оруулсан хичээлийг оруулж шалгалтыг боловсруулж байсан. Энэ жилийн даалгаврыг зөвхөн танхимаар судалсан агуулгаар боловсруулсан. Тухайлбал, 11 дүгээр ангийн хичээлийн агуулгаас 50 хувь, 12 дугаар ангийн танхимаар судалсан хичээлийн агуулгаас 30 хувийг хамруулсан. Мөн 9-10 дугаар ангийн хичээлийн агуулгаас оруулж боловсруулсан.
Б.Лхам
