Одоогоос гурван жилийн өмнө Хэнтий аймгийн Батноров суманд “Хүлэгбаатар Боорчи-Андлалын өргөө” хэмээх түүхэн аялал жуулчлалын цогцолбор хэмээх байгууламжийг босгосон. Уг цогцолборыг Ерөнхий сайд Л.Оюун-Эрдэнэ ЗГХЭГ-ын дарга байхдаа санаачилж байсан бөгөөд хоёр тэрбумын төсөвт өртөгтэй баригдсан юм.

Их Эзэн Чингис хааны үнэнч анд Боорчийн Өлгий нутгийг түүхэн аялал жуулчлалын бүс болгон хөгжүүлбэл жилд хэдэн зуун саяар тоологдох жуулчин ирнэ зэргээр барин тавин ярьж байсан ч одоо тэнд юун хүн очих манатай болж.

Хаалганых нь цонх хагарсан, плита нь цуурсан, дээр нь сарааччихсан, өнгө нь өдрөөс өдөрт гундаж үзэж харчихаар юу ч үгүй. Бараг хогийн цэг шиг болж. Улсын өч төчнөөн төгрөгийн хөрөнгөөр барьсан “Андлалын” гэх хөшөөнд харж хандах хэн байна вэ. Улаанбаатарын траншейны таг нь хүртэл манах эзэнтэй байхад түүхэн ач холбогдолтой хэмээн сүр дуулиан болгоод байсан газарт ямар манаач байна вэ.

Л.Оюун-Эрдэнэ сайд аа, таны санаачилж бариулсан Андлалын хөшөө баригдаагүй балгас болж байна гэхэд хилсдэхгүй боллоо.

А.Сүх