Байгаль орчин, аялал жуулчлалын яам санаачлан олон улсын байгууллагуудын дэмжлэгтэйгээр “Эх дэлхийгээ ирээдүйдээ өвлүүлье” нэг сарын аяныг зохион байгуулж байгаа билээ. Тус аяны хүрээнд Байгаль орчин, аялал жуулчлалын сайд Б.Бат-Эрдэнэ, НҮБ-ын Хүнс, хөдөө аж ахуйн байгууллагын Монгол дахь суурин төлөөлөгч Винод Ахужа, Германы олон улсын хамтын ажиллагааны нийгэмлэгийн хэрэгжүүлж буй Spaces/Stream төслийн удирдагч Михаэл Трокенбродт нар өчигдөр “Ид шидийн орон” хүүхэд хамгааллын төвийн багачууд хүүхдүүдтэй уулзжээ. 

Энэ үеэр зочид “Лантуун дохио” ТББ-ын төлөөлөлтэй уулзалт хийж, тус төвд хамрагдаж буй 8-13 насны 50 гаруй хүүхдүүдтэй ойн талаар ярилцаж, хүүхдүүдэд виртуал музей болон “VR” төхөөрөмжөөр Монгол орны байгалийн цогцолбор газар болон ойг үзүүлсэн байна. Түүнчлэн НҮБ-ын Хүнс, хөдөө аж ахуйн байгууллагаас бэлтгэсэн “Ойн тухай”, “Ой ба Ус” зэрэг танин мэдэхүйн баримтат киног үзүүлжээ. 

“Ид шидийн орон” хүүхэд хамгааллын төв нь: 

1. ХАМГААЛАХ ТӨВ -Хүчирхийлэлд өртсөн хүүхдийг хамгаалах, холбон зуучлах үйлчилгээ үзүүлэх. Хүчирхийлэлээс урьдчилан сэргийлэх мэдээлэл хүргэх таниулах болон боловсролын үйлчилгээ,

2. ХҮҮХЭД ХАРАХ ҮЙЛЧИЛГЭЭ -Сургуулийн өмнөх насны хүүхдүүдэд үзүүлэх боловсрол хүмүүжлийн үйлчилгээ, хөгжлийн бэрхшээлтэй хүүхдүүдэд зориулсан боловсрол хүмүүжлийн үйлчилгээ,

3. ӨДӨР ӨНЖҮҮЛЭХ БҮЛЭГ ~Сургуулийн бага болон дунд ангийн хүүхдүүдэд боловсрол хүмүүжлийн үйлчилгээ, спортын дугуйлан, сургуулийн өмнөх насныханд зориулж хүүхдийн цэцэрлэг,

4. "ӨСВӨР НАС" ТӨВ -Өсвөр насны хүүхдүүдэд зориулсан сэтгэл зүйн зөвлөгөө өгөх, Амьдрах ухаанд сургах төв, Боловсролын үйлчилгээний төв,

5. Номын сан, Эцэг эхийн боловсролын төв, Сайн хөрш хөтөлбөр зэргийг хэрэгжүүлж хотын захын гэр хорооллын хүүхдүүдэд аюулгүй тав тухтай, тохилог орчныг бий болгох, хүүхэд сурах, хөгжих, хүмүүжих, соёлжих нөхцөлөөр хангахаар зорин ажилладаг байна.

Д.Батчулуун