Япон улсын Нийгата мужийн Шинжлэх ухаан, технологийн хамтын ажиллагааны холбоо нь Монгол болон Зүүн хойд Азийн орнуудтай байгаль орчин, технологийн чиглэлээр хамтын ажиллагаагаа хөгжүүлж байна. Монгол-Японы төвтэй эхлүүлсэн хамтын ажиллагааны хүрээнд хүний нөөцийн менежмент, үйлдвэрлэлийн салбарын туршлага солилцох, дадлага сургалт зохион байгуулах ажлууд хэрэгжжээ.
Нийгата мужийн Шинжлэх ухаан, технологийн хамтын ажиллагааны холбоо нь 1989 онд байгуулагдсан төрийн бус байгууллага юм. Өдгөө тус холбоо нь үйл ажиллагааныхаа хүрээг өргөжүүлж, Монгол зэрэг Зүүн хойд Азийн орнуудтай байгаль орчин, технологийн чиглэлээр хамтран ажиллаж байна.
Монгол Улстай хийж буй хамтын ажиллагаа 2024 онд Монгол-Японы төвтэй хамтын ажиллагаагаа эхлүүлснээр шинэ шатанд гарчээ. Улмаар 2025 онд тус холбооны захирал Хасэгава Монгол-Японы төвд үйлдвэрлэлийн орчин дахь 5S-ийн талаар лекц зохион байгуулсан байна.
Хамтын ажиллагааны хүрээнд Японд үйлдвэрлэл, байгууллагын ажлын орчинд өргөн хэрэглэдэг ажлын байрны зохион байгуулалт, эмх цэгцийн аргачлалын талаар дэлгэрэнгүй ярилцаж арга туршлгааасаа хуваалцлаа.
5S нь ангилах, эмхлэх, цэвэрлэх, стандартчилах, хэвшүүлэх гэсэн утга санаа бүхий. Зөвхөн үйлдвэрлэлийн орчноор хязгаарлагдахгүй бүхий л салбарт зайлшгүй хэрэгтэй систем юм.
Энэ үйл ажиллагаанд Монгол Улсад үйл ажиллагаа явуулж буй компани, аж ахуй нэгжийн төлөөллүүд оролцож эмх цэгцийн 5S арга системийн талаарх мэдлэг туршлагаа нэмэгдүүллээ. Монголд энэ арга хэдийн нэвтэрч, хэрэгжиж байгаа ч ААН-үүд улам сайжруулалт хийх шаардлагатай. Иймд Нийгата мужийн шинжлэх ухаан технологийн хамтын ажиллагааны холбоо хамтын ажилагааны хүрээнд ийнхүү дадлага сургалтыг хийлээ.
