“Хүн аалз” киногоороо дэлхийд танигдсан жүжигчин Тоби Магуэр экс эхнэр, үнэт эдлэлийн дизайнер Женнифер Мейерийнхээ хуримын ёслолыг өөрөө хөтөлжээ. Тэдний гэрлэлт цуцлагдсан тухай шийдвэр гарснаас ердөө хэдхэн хоногийн дараа болсон энэ үйл явдал олны анхаарлыг татсан байна. Хурим 2026 оны аравдугаар сарын 10-нд АНУ-ын Хавайн арлууд дахь Four Seasons Resort Lanai амралтын газарт болжээ.
Женнифер Мейер хөгжмийн салбарын бизнес эрхлэгч Жеффри Огүнлэситэй гэрлэсэн бөгөөд ёслолын үеэр 51 настай Тоби Магуэр хосын тангаргийг удирдан, тэднийг эхнэр нөхөр болсныг зарласан байна. Энэ тухай Los Angeles Times, E! News зэрэг хэвлэл мэдээлжээ.
Хуримд Холливудын алдартнууд ч хүрэлцэн ирсэн бөгөөд жүжигчин Леонардо Ди Каприо, түүний найз бүсгүй Виттория Черетти, Amazon компанийн үүсгэн байгуулагч Жефф Безос болон түүний эхнэр Лорен Санчес, жүжигчин Кортни Кокс нар оролцсон байна.
Тоби Магуэр, Женнифер Мейер нар 2003 онд танилцаж, 2007 онд гэрлэсэн бөгөөд 2016 онд тусдаа амьдрах болсноо зарлаж байв. Мейер 2020 онд гэрлэлтээ цуцлуулах хүсэлт гаргасан ч хуулийн үйл явц 2026 оны аравдугаар сарын эхээр эцэслэн шийдвэрлэгджээ. Тэд хамтдаа Руби, Отис хэмээх хоёр хүүхэдтэй. Хосууд салсан хэдий ч хүүхдүүдээ хамтран өсгөж, гэр бүлийн харилцаагаа хадгалсаар ирсэн байна. Хүүхдүүд нь ээжийнхээ хуримд мөн оролцжээ.
Мейер өмнө нь ярилцлага өгөхдөө Магуэрийг өөрийнх нь хамгийн сайн найз хэмээн тодорхойлж, түүний төлөө юу ч хийхэд бэлэн гэдгээ илэрхийлж байв. Тэд хүүхдүүдээ өсгөх явцдаа бэрхшээлтэй тулгарсан ч харилцаагаа сайжруулахын тулд хамтдаа сэтгэл зүйн зөвлөгөө авч байсан тухайгаа ч хуваалцжээ.
Сонирхолтой нь, Мейер шинэ нөхөр Жеффри Огүнлэсигаас 2026 оны зургадугаар сард охинтой болсон байна. Түүний нөхөр нь Нигерийн тэрбумтан, хөрөнгө оруулалтын банкир Адебайо Огүнлэсигийн хүү бөгөөд хөгжмийн болон энтертайнмент менежментийн чиглэлээр бизнес эрхэлдэг аж. Ийнхүү гэр бүлийн амьдралаа дуусгасан ч нөхөрлөлийг хадгалж чадсан Тоби Магуэр, Женнифер Мейер нарын харилцаа олны анхаарлыг татаж байна. Экс эхнэрийнхээ шинэ амьдралын эхлэлийг өөрөө хөтлөн удирдсан жүжигчний энэ үйлдэл салалт бүр заавал дайсагналаар төгсөх албагүйг харуулсан нэгэн жишээ болжээ.
Л.Баяр
