АНУ-ын Ерөнхийлөгч Дональд Трамп ням гарагт Орос, Украин хоёр эрчим хүчний байгууламжид халдах ажиллагааг зогсоох буюу “эрчим хүчний салбарт гал зогсоох” тохиролцоонд хүрсэн гэж мэдэгдлээ. Гэвч Украины тал энэ мэдэгдлийг урьдчилан мэдээгүй байсан бөгөөд Оросын тал ч уг тохиролцооны талаар тодорхой мэдээлэл өгөөгүй байна. Трамп ням гаргийн өглөө Truth Social нийгмийн сүлжээндээ “Орос, Украины дайнд эрчим хүчний салбарт гал зогсоох тохиролцоо нэн даруй хэрэгжиж эхэлнэ. Хоёр тал зөвшөөрсөн. Үүнийг зөрчиж болохгүй!” хэмээн бичжээ.
Гэвч Украины Ерөнхийлөгч Владимир Зеленскийн ойрын эх сурвалж CNN-д мэдээлэхдээ уг мэдэгдэл Киевийн хувьд гэнэтийн зүйл болсон гэж хэлсэн байна. Украины өөр нэг албан тушаалтан “Бид ч мөн адил Ерөнхийлөгчийн нийтлэлээс л энэ тухай мэдлээ” хэмээн ярьжээ. Зеленский гал зогсоох санаачилгыг дэмжиж буйгаа илэрхийлсэн ч АНУ-аас тодорхой мэдээлэл хүлээж байгаагаа мэдэгдсэн байна.
“Хэрэв тэд эрчим хүчний салбарт гал зогсоохыг хүсэж байгаа бол бид үүнд бэлэн. Бидэн рүү довтлохоо зогсоо. Хүүхдүүдийг минь бүү хөнөө. Бид танай дизель түлшний байгууламжууд руу довтлохоо зогсооно. Энэ бол шударга тохиролцоо гэж бодож байна” хэмээн Зеленский ABC News телевизэд өгсөн ярилцлагадаа хэлжээ.
Энэхүү мэдэгдэл нь Трамп ОХУ-ын Ерөнхийлөгч Владимир Путинтэй ярилцаж, Оросын дизель түлш нийлүүлэхтэй холбоотой маргаантай тохиролцоог зарласнаас хэдхэн хоногийн дараа гарчээ.Баасан гарагт АНУ, Украины өндөр албан тушаалтнуудын оролцоотой хэлэлцээ Майамид эхэлсэн бөгөөд Трампын хүргэн Жаред Кушнер, тусгай элч Стив Уиткофф нар ч хэлэлцээнд оролцсон байна.
Украины тал Оросын түлшний нийлүүлэлттэй холбоотой тохиролцоог шүүмжилж, энэ нь Москвагийн дайны санхүүжилтийг дэмжих эрсдэлтэй гэж үзжээ. Харин Трамп бямба гарагт Зеленскийг шүүмжилж, “Тохиролцоонд хүрч чадах шинэ удирдагчтай болох цаг нь болсон” хэмээн мэдэгдсэн байна.
Эрчим хүчний салбарт гал зогсоох тохиролцоог яг ямар нөхцөлөөр байгуулсан, хоёр тал хэрхэн хэрэгжүүлэх нь тодорхойгүй хэвээр байв. CNN энэ асуудлаар Цагаан ордон болон Кремльтэй холбогдож, тохиролцоонд хэрхэн хүрсэн болон цаашид ямар алхам хийх талаар тодруулга хүсжээ. Зеленский өмнө нь эрчим хүчний байгууламжуудад харилцан халдахгүй байх санаачилгыг дэмжиж байгаагаа илэрхийлсэн ч Украины тал Оросын довтолгоо зогссон эсэхийг бодит үйл явдлаар үнэлэх шаардлагатайг онцолжээ.
Л.Баяр
