Юм үнэнээрээ сайхан. Тэр тусмаа алган дээр тавьсан юм шиг ил зүйлийг арай өөрөөр тайлбарлаад байвал ард түмэн эсэргүүцдэг юм. Яг тийм зүйл хүүхдийн парк буюу Үндэсний соёл амралтын хүрээлэн дээр болчихлоо.

Хотын дарга Д.Сумъяабазар очоод хашааг нь буулгах үүрэг өгч, паркийг паркаар нь ашиглана гэж мэдэгдэхэд нийслэлийнхэн алга ташин хүлээж авсан. Тэгтэл яг түүний мэдэгдэлтэй зэрэгцэн паркийг хөгжүүлэх дараагийн шат гээч юмыг “Үндэсний соёл амралтын хүрээлэн” ХХК зарладаг юм.

Нийслэлийн төвд үлдсэн жаахан газар, ногоон байгууламж болговол хүн бүр баярлах байсан ч бас л бетонон ширэнгэ болгох төлөвлөгөөг "Үндэсний соёл амралтын хүрээлэн" ХХК-ийнхан зохиож суугаа бололтой. Өнгөн дээрээ газар доорх мянган машины зогсоол бүхий цэцэрлэгт хүрээлэн барина гэх боловч үнэндээ асар олон барилга, байгууламж барихаар төлөвлөсөн нь тарааж буй мэдээ, бичлэг бүрээр нь батлагдаж байна.

Тэнд битүү дээвэртэй тоглоомын төвүүд, кино театр, музей, “Түмэн эх чуулга”-ын шинэ барилга, худалдаа үйлчилгээний төвүүд барина гэнэ ээ. Эд чинь бүгд л бетонон ширэнгэ шүү дээ.

Яагаад Монгол Улсын нийслэлийн төвд нэг ч гэсэн амарч зугаалах ногоон байгууламж үлдээж болдоггүй юм бэ. Барилгажуулах л төлөвлөгөө ярьж, бас тэрийг нь баталж суух юм гэж үү. Хүүхдийн паркийг хүүхдүүдэд нь үлдээе. Тэгэхдээ ногоон байгууламж хэлбэрээр шүү. Түүнээс бетонон ширэнгэ нэмэхийгээ хүүхдийн төлөө гэвэл хүмүүс эсэргүүцнэ гэдгийг хэлчихье.

С.Сүлд