Монгол Улсын Шадар сайдын баталсан “Үер, уснаас үрсээ хамгаалъя” нөлөөллийн аяны хоёрдугаар үе шат албан ёсоор нээлтээ хийж байна. Энэхүү аяныг Онцгой байдлын ерөнхий газар, Боловсрол шинжлэх ухааны яам, Далайн тээврийн газар, Монголын Улаан загалмай нийгэмлэг хамтран хэрэгжүүлэх юм. Манай улс усны осолд өртөх өндөр эрсдэлтэй орнуудын тоонд багтаж байгаа ба өнгөрсөн 2020 онд 33 хүүхэд, 2021 онд 31 хүүхэд усанд осолдож амь насаа алдсан байна. Энэ нь өнгөрсөн 2018, 2019 онуудтай харьцуулбал даруй хоёр дахин нэмэгдсэн байдал ажиглагдсан. Иймд бага насны хүүхдийн амь насыг усны ослоос хамгаалсан тал бүрийн оролцоог хангасан өргөн хүрээтэй нөлөөллийн ажлыг зохион байгуулах юм.

Онцгой байдлын ерөнхий газрын Гамшгаас урьдчилан сэргийлэх газрын сургалт, сурталчилгааны хэлтсийн дарга, дэд хурандаа Д.Бат-Эрдэнэ "Амралт, аялал зугаалга эхэлдэг энэ үед гол мөрөн бараадаж амардаг энэ үед усны боловсрол, усанд сэлэх, хариу үйлдэл үзүүлэх дадлага мэдлэггүй хүмүүс их хэмжээний устай газраар аялах нь эрсдэлийг дагуулдаг. Тиймээс иргэдийг уснаас зайтай, эрсдэл багатай газраар амарч зугаалахыг сануулдаг хэдий ч энэ төрлийн эрсдэл гарсаар байна. Хэд хэдэн зонхилох шалтгаан бий. Зуны амралтын үеэр хүүхдүүд нийлж сэрүүцэх зорилгоор гол усанд орохдоо нэг нь хөл алдвал аврах гэж араас нь ороод олноороо амь эрстэх тохиолдлууд цөөнгүй байгаа. Мөсний зузаан багасаж байгаа энэ үед тээврийн хэрэгслээр зорчих, явганаар зорчих, хүүхдийг цана чаргаар чирэх гэх мэт аюултай үйлдэл хийх нь эрсдэл дагуулдаг. Малаа услахаар явахдаа хүүхдүүд явганаар болон морьтойгоо усанд урсаж аюулд өртөх, амарч зугаалж явахдаа архи, согтууруулах зүйл хэрэглэснээс болж хүүхдэдээ тавих хараа  хяналтаа сулруулснаас үүдэн хүүхэд усанд эндэх зэрэг шалтгаанууд гардаг"  гэв.

Т.Мөнхжаргал