Хуульч Б.Мэргэн хөгжлийн банкны зээл болон "Хөтөл цемент шохой" ХК -ны асуудлаар мэдээлэл хийлээ. Тэрбээр "Шинэ захиралын зүгээс яагаад авсан талаараа тайлбарлахдаа өв залгамжлагч байхгүй, 100 хувь эзэмшигч нас барсан, иймд эзэнгүй болсон өмчөө төр буцааж авч байна гэж тайлбарладаг. Гэвч Хөгжлийн банкнаас авсан зээлийг хэн төлөх вэ? гэхэд “компани өөрөө төлнө” гэдэг. Хурааж авахаараа эзэнгүй болчихдог, өр төлөх болохоор эзэн нь төл гэдэг.

М.Бөх-Очир 2018 онд нас барсан бөгөөд эхнэр, үр хүүхдүүд нь өв хүлээж авахаас татгалзсан. Харин Б.Тулга түүнийг нас барснаас хойш нэг жилийн дотор өв нээх хүсэлтээ өгөөгүй учир хүлээж авах эрх байхгүй гэдэг.Гэтэл хуулийндаа хэрэв хамтран амьдарч байсан үр хүүхэд нь өв нээх хүсэлтээ өгөөгүй бол автоматаар өв залгамжлагч болдог.

Тиймдээ ч өвлөх эрхээ баталгаажуулах хүсэлтэй байгаа тул өнөөдөр Хөгжлийн банкинд дөрөв дэх албан бичгээ өглөө. Өмнө нь Нотариатчидын танхимд маш олон удаа хандсан ч “Хөгжлийн банк зөвшөөрөөгүй байхад өв өгч болохгүй” гэсэн бичиг ирдэг.  Харин Хөгжлийн банкнаас “Ийм зүйл байхгүй, өвөө хурдан аваад өрөө төл” гэдэг.

Шинээр томилогдсон Л.Наранбаатар "Цемент шохой" ХК-ийг шилжүүлэн авсан  ч “Компанийн өр төлбөрийг шилжүүлэн авахгүй, та нар төл гэсэн” гэв. Хэрэв Б.Тулга өвийн гэрчилгээг авбал тухайн компанийн өрийг төлөх юм.

Мөн 1.3 тэрбум төгрөгөөр худалдаж авсан талаар яриад байгаа. Гэтэл энэ нь тухайн үеийн “Хөтөл цемент шохой” ХК-ийн 119 сая төгрөгийн үнэлгээтэй хувьцааг авсан баримт байдаг.  Үүнээс гадна хувьчлагдахаас өмнө нийт 39,3 тэрбум төгрөгийн өртэй байсан. Энэ өрийг төлөөд, хувьцааг нь төлж байгаа нь худалдаж авч байгаа үнэд оруулах нь ойлгомжтой” гэв.