Өнгөрсөн долоо хоногт юу болж өнгөрсөн бэ? 24tsag.mn уншигч та бүхэндээ долоо хоногийн тойм мэдээг бэлтгэн хүргэж байна.

Экстремист гэмт хэрэг үйлдэхээр бэлтгэж байсан таван иргэнийг саатуулжээ

Тагнуулын байгууллагаас эрүүгийн хуульд заасны дагуу экстремист гэмт хэрэг үйлдэхээр бэлтгэж байсан Монгол улсын нэр бүхий таван иргэнийг саатуулсан ба мөрдөн шалгах ажиллагаа үргэлжилж байна. Дээрх этгээдүүд нь экстремист үйл ажиллагаа явуулахаар багагүй хугацаанд төлөвлөн бэлтгэж байсан. Тухайн этгээдүүдийн орон гэр, ажлын байр хийсэн үзлэг нэгжлэгээр улсын онц чухал объектуудыг зэвсэглэн хяналтад авахаар төлөвлөсөн гар бичмэл, хууль бусаар олж авсан байлдааны болон  бусад зориулалтын галт зэвсэг, зэвсгийн чанартай галт зэвсэг илэрсэн.

“Шинэ Зуунмод” хотын ерөнхий төлөвлөгөө батлагдлаа

Засгийн газрын хуралдаанаар Хөшигийн Хөндий дэх “Шинэ Зуунмод” хотын ерөнхий төлөвлөгөө батлагдлаа.  2019 онд ЗГ шинэ онгоцны буудлыг дагаж аэро-сити төлөвлөлтийг баталсан. Түүнээс хойш 2020 онд  орон нутгийн зэрэглэлтэй Шинэ Зуунмод Майдар хотыг байгуулах шийдвэр гаргасан. Ерөнхий төлөвлөгөө батлагдсанаар хийгдэж байгаа инженерийн дэд бүтцийн ажлын зургууд магадлалаар орж, эцэслэгдэж гарна. Ажлын зургуудын нийт дүн ойролцоогоор 500 орчим тэрбум төгрөгийн төсөв урьдчилсан байдлаар гарсан. Энэ жил Монгол улсын засгийн газраас 33 тэрбум төгрөгийг инженерийн дэд бүтцийн хөрөнгө оруулалтад тавьсан. Ажлын зургууд магадлалаар орж батлагдсаны дараа тавдугаар сард багтаж эхний ажлуудыг хийнэ.

“Монголын эдийн засгийн чуулган-2022” болов

Төр засаг, хувийн хэвшил, иргэний нийгэм, эрдэмтэн судлаачдын төлөөллийг оролцуулсан Монгол Улсын хөгжлийг хурдасгах зорилго бүхий “Монголын эдийн засгийн чуулган-2022” өнөөдөр /2022.04.07/ эхэллээ. уг чуулганаар “Шинэ сэргэлтийн бодлого”-ыг хэрэгжүүлэх хүрээнд зохион байгуулна. "Шинэ сэргэлтийн бодлого" нь төр-хувийн хэвшил, хөрөнгө оруулагчдын идэвхтэй түншлэлд тулгуурлан Монгол Улсын эдийн засгийн харaат бус, бие даасан байдлыг бэхжүүлэх, цар тахлын эдийн засагт үзүүлэх сөрөг нөлөөллийг бууруулах, хөгжлийг хязгаарлагч хүчин зүйлийг цаг алдалгүй шийдвэрлэж, "Алсын хараа-2050" урт хугацааны хөгжлийн бодлогыг үр дүнтэй хэрэгжүүлэх суурь нөхцөлийг бүрдүүлэхэд чиглэсэн дунд хугацааны зорилтот хөтөлбөр юм.

Залуучууд төв талбайд жагсаж, Ерөнхий сайд уучлалт гуйв 

Үнийн өсөлтийг бууруулахыг шаардсан залуусын жагсаал Сүхбаатарын талбайд үргэлжилж байна. Ерөнхий сайд Л.Оюун-Эрдэнэ өнөөдөр залуустай уулзаж, тэдний хүсэлт, шаардлагыг хүлээн авсан. Уулзалтын үеэр залуусын шаардлагын дагуу Засгийн газрын ээлжит бус чуулганыг хуралдуулах болсноо зарласан юм. Үүний дагуу Засгийн газар хуралдаж зарим шийдвэрийг гаргажээ. Шийдвэрийг Ерөнхий сайд Л.Оюун-Эрдэнэ танилцууллаа. Хуралдаанаар төрийн албан хаагчид том оврын автомашиныг Улаанбаатар хот дотор ашиглахгүй байх, төрийн албан хаагчдын тасалгаанд метр, квадратын хязгаар тогтоохоор шийдвэрлэсэн юм.

• Төрийн байгууллагууд тавилга худалдан авахаар зарласан 1.3 тэрбум төгрөгийн тендерээ цуцалжээ
• БОАЖЯ-ны эд хөрөнгийн бүртгэлд байгаа албан томилолтод ашиглахаас бусад туулах чадвар сайтай автомашинуудыг дуудлага худалдаагаар худалдаалж, орлогыг улсын төсөвт төвлөрүүлэхээр болжээ.

ЗГ: Залуусын төлөөллийг оролцуулсан Ажлын хэсэг байгуулна

Ажлын хэсэг өргөн хэрэглээний бараа бүтээгдэхүүний үнэ ханшийг тогтворжуулах, Авилга, албан тушаалын хэрэгт яллагдагчаар татагдсан этгээдийн хэргийг хялбаршуулсан журмаар шийдэхгүй байх, авилгын хэргийн ялын бодлогыг чангатгах, хөгжлийн банкны зээлийн асуудлыг шударгаар шалгаж, буруутай этгээдүүдийг илрүүлэх, хэргийг эцэслэн шийдвэрлэх, хэмнэлтийн горимд шилжих зэрэг Засгийн газрын 2022 оны дөрөвдүгээр сарын 08-ны өдрийн ээлжит бус хуралдаанаас гарсан шийдвэрийг хэрэгжүүлэн ажиллах юм.

УИХ-ын гишүүн Г.Амартүвшин бүрэн эрхээсээ түдгэлзэх хүсэлт гаргалаа

УИХ-ын гишүүн Г.Амартүвшин нүүр хуудсаараа дамжуулан бүрэн эрхээсээ түдгэлзэх санал гаргалаа. Түүнийг 2019-2020 онд Хөгжлийн банкны захирлын үүрэг гүйцэтгэгчээр ажиллах хугацаанд олгосон, 22 тэрбум төгрөгийн зээл чанаргүй ангилалд багтсан. Энэ нь өмнөх захирлуудын гарын үсэг зурж олгосон, чанаргүй зээлийн нийт дүнгээс бага боловч түүнийг эрх мэдэл, албан тушаалаа урвуулан ашиглаж, ойр дотнын хүмүүстээ зээл олгосон байж болзошгүй гэх мэдээлэл гарсан юм.

Д.Батчулуун