"Эрдэнэс Тавантолгой" ХК-ын төлөөллүүд цаг үеийн асуудлаар мэдээлэл өглөө.
Тэрбээр "Эрдэнэс Таван толгой ХК-аас Цанхийн баруун уурхайн нөхөн суултын тендэр шалгаруулалтыг зарласан. 3 сарын 16-ны өдөр тендэр шалгаруулалтын нээлтийг хийхэд нэгдүгээр багцад гурав, хоёрдугаар багцад хоёр ААН орсон.
Цанхийн баруун уурхайн хөрс хуулалтын ажил 2019 оны 12 сарын 31-ны өдөр, нэр бүхий хоёр ААН-тэй гурван жилийн хугацаатай гэрээ байгуулж, гэрээний хугацаа дууссан учир дахин зарлах нөхцөл байдал бий болсон. Өөрөөр хэлбэл 2019 онд байгуулагдсан гэрээ 2023 оны 2 сард дуусаад, төсвийнхөө дагуу холбогдох хууль тогтоомжид тулгуурлан төрийн болон орон нутгийн өмчийн хөрөнгөөр бараа, ажил үйлчилгээ худалдан авах хуульд заасны дагуу тендер зарласан. Өмнө нь байгуулагдаад хийгдэж байсан гэрээний хувьд 1м.куб уулын цулын ажлыг 12,900 төгрөгөөр тооцож гүйцэтгэлийг нь өгч явсан байна.
Бид нар тендерийн баримт бичигт 1м.куб уулын цулын ажлыг 11,982 төгрөгөөс хэтрүүлэхгүйгээр санал болгоно гэсэн шаардлага тавьсан. Уг шаардлагыг тавьснаар “Эрдэнэс таван толгой” ХК зөвхөн хоёрдугаар багцаас 72 тэрбум, нэгдүгээр багцаас 62 тэрбум орчим төгрөг, нийт 130 тэрбум төгрөгийг батлагдсан төсвөөсөө хэмнэх бололцоо бий болсон.
Тендэрийн баримт бичигт тавьсан шаардлагуудыг хангасан ААН-үүдээс хамгийн бага үнийн санал ирүүлсэн буюу хамгийн бага харьцуулах үнэ ирүүлсэн этгээдийг хамгийн сайн тендерт ролцогч гэж томъёолдог. Энэ үнэлгээний аргачлалын дагуу тендерийн үнэлгээ хийхэд татварын өртэй учраас эрх бүхий бус “Хишиг арвин” компаниас бусад нь шаардлага хангасан байсан. Үүнд “KI mining”, болон үнэлгээний дагуу “Erdes mining operator” гээд гурван компанийн түншлэл бүхий ААН нэгдүгээр багцад шалгарсан. Харин хоёрдугаар багц дээр “Овоот толгой ресурсес” болон 575 тэрбум орчим төгрөгөөр “Monnis mining”, гэсэн хоёр компани шалгарсан.
Тендерийн баримт бичиг дээр тавьсан шаардлагуудаас дурдвал, инженер техникийн ажилтан 30, машин техник 82 зэрэг уулын ажлынхаа цар хэмжээтэй хамааралтай, энэ жилдээ олборлох уулын цулын ажлыг гүйцэтгэх боломжтой техник хэрэгслүүдийг өрсөлдөх тэгш байдлыг хангах үүднээс стандартын дагуу тендер зарласан. Мөн холбогдох бүх мэдээллүүдийг төрийн байгууллагын мэдээлийн сан буюу тухайн инженер техникийн ажилтан нь тус байгууллагад ажилладаг эсэх, тухайн машин техник нь ажилд оролцогчийнх эсвэл хэн нэгнээс хөлсөөр авсан эсэх, гэрээтэй бол тухайн гэрээ байгуулсан этгээдийн нэр дээр байгаа эсэхийг АТҮТ-ийн мэдээллийн системээс, инженер техникийн ажилтны мэдээллийг НД-ын мэдээллийн системээс авна. Тухайн ажилтан нь уул уурхай, геологийн чиглэлийн мэргэжилтэй үгүйг “Дээд боловсролын мэдээллийн сан”-гаас шалгаж, үнэлгээг хийсэн.
Мөн ААН-үүд хуульд заасны дагуу татварын өргүй, шүүх болон шүүхийн шийдвэр гүйцэтгэх газарт аливаа хэрэг маргаанд ороогүй байх ёстой гэх мэт тодорхойлолтуудыг холбогдох төрийн байгууллага буюу анхдагч мэдээллийг хадгалдаг мэдээллийн сангуудаас цахим системээр шалгасан. Түүнчлэн санхүүгийн чадварыг харилцагч банкны тодорхойлолт, тухайн оролцогчийн санхүүгийн тайлан, шаардлагатай бол аудитын дүгнэлт, зөвлөхийн орон тоо, цалин, бусад зардлын тооцооны хүснэгт гэсэн байдлаар үнэлдэг. Энэ үнэлгээний аргачлалын дагуу тендер шалгаруулалтад оролцсон ААН-үүдээс татварын өртэй нэг этгээдээс бусад нь бүх шаардлагыг хангасан гэж үзээд дээрх шийдвэр гарсан” гэв.
М.Дэвээжаргал
